Временскиот интервал кој што треба да помине за да се прими трета доза е шест месеци, а кај нас, посочи Филипче, се уште никој од имуно-компромитираните пациенти нема примено трета доза бидејќи не се поминати шест месеци од ревакцината
Со аплицирање на трета доза од вакцината на „Фајзер“ значајно се зголемува ефикасноста кон сите соеви на вирусот, порача министерот за здравство, Венко Филипче во денешното гостување во дневникот на Сител.
Тој информира дека засега само Американската Агенција за храна и лекови (ФДА) има дадено препорака за трета доза на „Фајзер“-вакцината, но кај имуно-компромитирани пациенти, односно пациенти на кои им била извршена трансплантација или пациенти кои се на хронична дијализа.
„Во овој момент се уште траат испитувања во однос на тоа каков ефект има трета доза на вакцина. Една од последни студии која излезе беше студијата во Израел, која што укажа на тоа дека значајно се зголемува ефикасноста после дадена трета доза од вакцините. Според нашите сознанија компанијата „Фајзер“ е најдалеку отидена во овој дел. Засега само американската агенција има дадено препорака за трета доза на Фајзер вакцина, но кај имуно компромитирани пациенти. Тоа се пациенти кои се трансплантирани и пациенти кои се на хронична дијализа. Европската агенција се уште ја нема дадено таа препорака, така што уште сме во фаза кога ги очекуваме препораките, како од производителите, така и од големите клинички студии на големи серии на пациенти“,
изјави Филипче.
Тој посочи дека кај нас веќе има препорака за трета доза за пациенти кои што се трансплантирани и пациенти кои се на хронична дијализа. Филипче најави дека следнава недела ќе започне и комуникација со дијализни пациенти за да го проценат бројот на лица кои би требало да добијат трета доза.
Временскиот интервал кој што треба да помине за да се прими трета доза е шест месеци, а кај нас, посочи Филипче, се уште никој нема примено трета доза бидејќи не се поминати шест месеци од ревакцината.
„Тоа што кај некои луѓе се губи количината на детектирани антитела не значи дека немаат имунитет. Впрочем, анализите покажуваат дека бустер дозата ги зголемува антителата во количини, што значи дека веќе од претходните примени дози е створен имунитет и организмот реагира и се брани, а доказ за тоа е бустер дозата односно повторниот контакт со вирусот“,
рече Филипче.
Тој напомена дека сите истражувања одат во таа насока да многу веројатно после шестиот месец ќе треба да се прими и бустер доза.
Филипче додаде дека сите граѓани кои се вакцинирале во странство кога ќе приложат валиден сертификат дека е тоа направено во друга држава, пример во Србија, ќе бидат регистрирани за трета доза, што значи дека ќе можат да ја примат кај нас и за тоа да добијат наш валиден сертификат.
Филипче рече дека вакцини во овој момент има доволно, а според проценките, ќе има и следната година.