Министерот за здравство Венко Филипче оцени дека ситуацијата во државава со ковид-19 е стабилна. Параметрите врз основа на кои го темели овој став се фактот дека повеќе време наназад, од вкупно направените тестови, позитивни се околу 10 до 15 проценти, a со широкиот пристап на тестирање се откриваат голем број асимптоматски носители на вирусот.
„Овој пристап, во однос на индикацијата за тестирање, а тоа е тестирање на сите кои имаат симптоми, меѓутоа и лицата кои се контакти и имаат исклучително висок ризик, е добра стратегија којашто треба да продолжи, поради тоа што се откриваат огромен број асимптоматски носители и со тоа се ставаат во изолација и на тој начин се спречува ширењето на инфекцијата. Еден од најдобрите индикатори како е сега ситуацијата е капацитетот во болниците – има сосема доволно слободни кревети на Инфективната клиника и во ГОБ ‘8 Септември'”,
изјави Филипче за ТВ Телма.
Филипче најави дека наскоро ГОБ „8 Септември“ ќе почне со редовно работење.
„Ние планираме веќе од следната недела да почне и распоредување на пациентите од ГОБ ‘8 Септември’ на Инфективната клиника, имајќи предвид дека таму има сосема доволно слободни кревети и на самата клиника, а целосно е празна и модуларната болница. Со тоа, ГОБ ‘8 Септември’ ќе се врати во редовна функција, пред сè во делот на ортопедијата. Добро се менаџира и со бројот на пациенти во инфективните одделенија низ државата, во клиничките и општите болници, секојдневно имаме утринска координација со директорите, во таа смисла сметам дека ситуацијата е апсолутно стабилна и под контрола“,
изјави Филипче.