Станува збор за прва реконструкција, по четири децении, на простор од 420 квадратни метри
Во Специјалната болница за гинекологија и акушерство „Мајка Тереза“ во Чаир, првпат по четири децении, се реновирани двете гинеколошки операциски сали. Станува збор за реконструкција на простор на површина од 420 м2, со целосно реновирање на двете постојни гинеколошки оперативни сали и воведување централен довод на гасови, како и целосно реновирање на одделот за реанимација и интензивно лекување, во вредност од 86 061 823 денари, соопштија од Министерството за здравство.
Паралелно со активностите за реконструкција и обезбедувањето нова медицинска опрема, како што се наведува во изјава на министерот Венко Филипче, во континуитет се врши и надополнување на кадарот и унапредување на експертизата на вработените.
„Во последните три години во болницата се примени вкупно 46 здравствени работници, од кои 11 доктори, 13 медицински сестри, пет акушерки и друг медицински и немедицински кадар. Исто така, се одобрени пет специјализации, две од областа на анестезиологија и по една за медицинска биохемија, болничка педијатрија и гинекологија и акушерство. Значајна новина е и почнатата гасификација на котелот за парно греење во оваа јавна здравствена установа. Со години наназад, стариот котел беше загадувач во градот Скопје. И во услови на пандемија со ковид-19 продолжува унапредувањето на условите во сите јавно-здравствени установи и подобра здравствена грижа за сите граѓани“,
велат од Министерството за здравство.