Филипче: Никој нема право да нè обвинува за етнички или националистички политики или пристап

Тој упати нов повик до претседателите на сите поголеми политички партии во следниот период да се состанат на лидерска средба бидејќи, како што кажа, не гледа никаква потреба партиите да се делат на македонски и албански кога станува збор за интересите на државата

Лидерот на опозицискиот Социјалдемократски сојуз (СДСМ), Венко Филипче, ги негира наводите на дел од партиите на Албанците дека вчерашната средба со премиерот и лидер на ВМРО-ДПМНЕ, Христијан Мицкоски, била моноетничка.

Во таа насока, претседателот на СДСМ наведе две работи.

Рече дека неговиот повик за средба бил до лидерите на сите политички партии, но дека само Мицкоски се одзвал на него, притоа потсетувајќи дека претседателот на една од партиите на Албанците кажа дека тоа би било губење време, алудирајќи притоа на ставот на еден од лидерите на коалицијата „Вреди“ и министер за здравство Арбен Таравари.

Таравари смета дека лидерската што ја предлага Филипче би била само губење време

„Иницијативата произлезе од трагедијата во Кочани, кога видовме дека има прашања битни за државата, за развојот на државата, во кој сите политички субјекти мораме да соработуваме, без разлика што имаме различен политички бекграунд, различни политики коишто сме ги имплементирале, што планираме да ги имплементираме и водиме и начинот на кој ги градиме во иднина. Уште една важна работа, јас на тој состанок вчера го претставував Социјалдемократскиот сојуз, а премиерот Христијан Мицкоски – ВМРО-ДПМНЕ и ние се состанавме како лидери на две најголеми партии во македонскиот блок, притоа премиерот беше прв кој без никаква забелешка и единствен ја прифати таа средба“,

рече Филипче кој денеска беше Струмица, каде што заедно со градоначалникот Костадин Костадинов присуствуваа на отпочнувањето на втората фаза од проектот за изградба на социјална населба во Струмица, на т.н. Струмички Рид.

Мицкоски и Филипче се договорија само за она што им е од заеднички интерес, велат од Алијанса за Албанците на Села

Тој упати нов повик до претседателите на сите поголеми политички партии во следниот период да се состанат на лидерска средба бидејќи, како што кажа, не гледа никаква потреба партиите да се делат на македонски и албански кога станува збор за интересите на државата.

„Апсолутно сметам дека треба да продолжиме во следниот период во насока на организација на лидерска средба на лидерите на сите големи политички партии и ова е уште еден повик, и е до сите, вклучувајќи ги и партиите од албанскиот блок. Јас тука апсолутно не гледам никаква потреба ние да се делиме на партии од македонски и од албански блок кога станува збор за интересот на државата. Во извршниот одбор на Социјалдемократскиот сојуз има Албанец, има Македонка-муслиманка, во следниот период во Централниот одбор ќе биде и Ромка. Ние сме мултиетничка партија. Никој нема право нас да нè обвинува за некакви етнички или националистички политики или пристап“,

кажа лидерот на СДСМ одговарајќи на новинарски прашања.

ДУИ: Како да се отстранат Албанците од сите нивоа на власт е една од точките на лидерската средба кои нема да ѝ се презентираат на јавноста

За вчерашната средба со Мицкоски во Владата, тој повтори дека поминала во добра и конструктивна атмосфера и на неа двајцата донеле заеднички став за начинот на кој ќе работат на реформската агенда, „сите партии заедно, по примерот на многу развиени демократии, како Шведска и Германија“.

„Ние и понатаму ќе бидеме политички различни меѓутоа кога станува збор за државата мораме да седиме сите заедно и да ги решаваме проблемите. Никој нема доволен човечки капацитет и потенцијал за кратко време нешто да сработи. Ние сме мала земја и во таа смисла мораме да се обединиме за најважните прашања“,

повтори Филипче.

Филипче по средбата со Мицкоски: Договоривме да формираме работни тела за реформската агенда

Да биде конструктивен фактор во определбата за реформи, побарал Мицкоски од Филипче

Тој не одговори конкретно на прашањето кои експерти ќе бидат вклучени и наведе само дека од партијата ќе идентификуваат експерти за областите каде има закони со јасна временска рамка кога треба да се донесат.

„Првата група закони се од областа на правосудството, за кое сите викаме дека треба да се реформира на соодветен начин, енергетиката, културата и делот на дигитализацијата. Ние ќе идентификуваме експерти од тие области и ќе ги понудиме на министерствата во рамките на процесот на изработка на законите и потоа можно е да продолжиме и во делот на Националниот совет за евроинтеграции за дополнителна дебата со експертски групи во делот на граѓанскиот сектор што е многу битно заради тоа што треба да се вклучи и секако различни стручни здруженија од разни области коишто имаат желба тоа да го направат“,

изјави Филипче.