Во моментов, кога ќе истечат шест месеци од примањето на втората доза, граѓаните преку СМС ќе добиваат порака дека може да се јават и да примат трета доза вакцина
Комитетот за имунизација даде препорака за трета доза вакцина кај одредени категории граѓани во земјава, објави денеска министерот за здравство Венко Филипче.
Според неговата изјава, трета доза се препорачува кај следните групи: сите граѓани над 60 годишна возраст; сите здравствени работници без разлика на возраста; сите пациенти што имаат имунокомпромитирана состојба, без разлика на возраста.
Третата доза ќе биде од производителот „Фајзер“ без разлика кои се првите две дози што ги примиле граѓаните и, според препораката, таа треба да се прими најмалку шест месеци по вакцинирањето со втората доза.
„Најмалку после шест месеци од примената втора доза за што сите граѓани кои примиле втора доза, во моментов кога ќе истечат шесте месеци ќе добијат порака дека може да се јават и да примаат трета доза вакцина. Пораката ќе стигне преку СМС како што стигнуваше и закажувањето преку системот ’Мој термин‘“,
рече Филипче на денешната прес-конференција.
Министерот рече дека се понатаму ќе се следи состојбата, односно дали ќе има препораки дека може да се прими трета доза и од некој од другите производители.
Досега во земјава со две дози односно ревакцинрани се над 700 000 граѓани. Интересот, рече Филипче, се намали, но сепак има бројка од 1 500-2 000 граѓани кои на дневно ниво примаат прва доза. Тој верува дека интересот нема да се намалува туку ќе расте со цел за што пократко време да се достигне степен на колективен имунитет.
Кога станува збор за вакцинирани барем со една доза, статистиките покажуваат дека е вакцинирано 37 отсто од вкупното население во државата. По возрасни групи, најголем процент вакцинирани има кај граѓаните над 70 години.
„Барем една доза вакцина на возрасната група граѓани над 70 години примиле 74 отсто од вкупниот број. 65 отсто над 60 години, 60 отсто над 50 години, 31 отсто на граѓаните од 18 до 39 години и 55 проценти од граѓаните над 40 години“,
рече Филипче.
Откако вчера во земјава пристигнаа околу 100 000 вакцини на „Фајзер“ преку механизмот Ковакс, министерот денеска оцени дека во моментов располагаме со доволно количини односно: околу 250 000 на „Фајзер“, 50 000 на „Синовак“ и околу 100 000 на „Астра Зенека“.
Кривата на новозаразени во моментов е рамна и повеќе денови има по околу 500 нови случаи на дневно ниво.
„Во однос на анализите на бројките од Институтот за јавно здравје, имаме епидемиолошка состојба која во овој момент во делот на кривата е речиси еднаков број на новодијагностицирани случаи, околу 500, повеќе денови наназад. Тоа во овој момент не прави никаков притисок во болниците, се зголемува бројот на слободни кревети во интерните клиники и на Инфективната клиника, тоа се случува и во неколку болници низ државата. Прилично е изедначен бројот на прегледи, пред сè, на Инфективната клиника – некаде околу 50-тина повеќе денови наназад“,
изјави министерот.