Министерството за здравство, во името на Венко Филипче, реагира на прес-конференцијата на ВМРО-ДПМНЕ и обвинувањата дека тој заедно со сопругата, нејзините родители и газдата на фирмата „Синерџи“ – Горан Филипов се сосопственици на 11 катастарски парцели во Нерези, со вкупна површина од 13.506 м2 и градат семејна куќа иако со деталниот урбанистички план тоа не е дозволено.
„Родителите на сопругата на министерот Филипче не располагаат со земјиште од 13 илјади квадратни метри, туку со околу 5000 квадратни метри, од кои најголемиот дел се земјоделско земјиште. Семејството гради само семејна куќа, на плац од 600 квадрати. Земјиштето е купено во 2015 година кога Венко Филипче не беше на функција министер за здравство“,
пишува во реакцијата на Министерството за здравство.
Филипче негира врски со фирмата „Синерџи“, за која ВМРО-ДПМНЕ тврди дека од една страна добива тендери од Министерството за здравство и од друга, е сосопственик на парцелите во Нерези.
„Компанијата која наводно се поврзува со министерот Филипче апсолутно не е на ниеден начин поврзана со него, ниту пак тој доделувал тендери за неа во висина од 7 милиони евра како што обвинува Стоилковски. Фирмата „Синерџи“ во Министерството за здравство има аплицирано на само една јавна набавка, која е во висина од 35 милиони денари (550 илјади евра), добиена во регуларна тендерска процедура. Најсмешно, сопругата на министерот воопшто не се вика Маја, како што наведува Стоилковски, со што уште еднаш се докажа какви неточни, несериозни и лажни информации пласира Стоилкоски за дневнополитички поени“,
пишува во реакцијата на Министерството за здравство.
*поврзана вест ВМРО-ДПМНЕ го обвинува Филипче дека ќе гради Шпанско село 2 на Водно
На денешната прес-конференција во партиското седиште, портпаролот на ВМРО-ДПМНЕ, Наум Стоилковски, обвини дека министерот Филипче ќе гради Шпанско село 2 на Водно, но немаше одговор по каков пат е добиено земјиштето. Тој рече и дека согласно урбанистичкиот план, за споменатите локации е предвидена намена А4, односно времено сместување, а се гради семејна куќа за што ознаката е А1.
„Оваа срамна прес-конференција со лажни обвинувања се должи на успешната работа на министерот и желбата на ВМРО-ДПМНЕ да ја дискредитира таа работа по секоја цена. Уште пострашно е што во период кога министерот и медицинскиот персонал е посветен на справување со коронавирусот, Стоилковски и ВМРО-ДПМНЕ се обидуваат преку лаги да ја дефокусираат јавноста“,
реагираат од Министерството за здравство.