Фудбалската федерација на Македонија официјално со допис до УЕФА побара одложување на натпреварот со Косово од полуфиналето во плејофот за пласман на Европското првенство, закажан за 26 март на Националната арена „Тодор Проески“ во Скопје.
Во дописот до Европската куќа на фудбалот, покрај проблемот со гледачите (забрана од македонската Влада за присуство на публика), ФФМ го потенцира проблемот со пристигнувањето на фудбалерите од македонската репрезентацијата, односно евентуалната изолација/карантин за одредени фудбалери кои би пристигнале од земјите со висок степен на присуство на коронавирусот.
„Токму поради овие вонредни причини, Фудбалската федерација на Македонија е во постојана и интензивна комуникација и со Министерството за здравство и Институтот за јавно здравје и во целост се придржуваме кон нивните препораки, донесените мерки или забрани. Исто така, по консултации со претставници на Фудбалските федерации на Грузија и Белорусија, една од двете држави кои беа одредени за домаќини на финалниот натпревар од Лига на нации на 31. март за пласман на ЕУРО 2020, неофицијалните информации велат дека е можно, репрезентацијата која би обезбедила пласман во финалето, да се соочи со одредени мерки на претпазливост за здравствена заштита при влез во една од државите. И во однос на ова, ФФМ, исто така е во постојан контакт со споменатите федерации и УЕФА“,
соопшти ФФМ.
Преку социјалните мрежи апел испрати и капитенот на фудбалската репрезентација Горан Пандев.
„Пласманот на Македонија на Европско првенство е многу повеќе од сите освоени титули. Живееме за слика од нашиот стадион со трибини покриени од навивачи во црвено-жолта боја кои ќе ни дадат сила и мотив да го надополниме се она што фудбалски го пропуштивме во последните 20 години. Дајте ни шанса за вистински спектакл, дајте ни шанса со нашите навивачи да се радуваме на победа и да бидеме на чекор од Европското првенството. Здравјето е најважно и секогаш се молиме за тоа. Но, дајте ни можност да го оствариме и се она за што сме сонувале како деца. За доброто на сите, одложете го натпреварот, и заради здравјето и затоа што е фер и спортски“,
апелира Пандев преку неговиот профил на Инстаграм.
Инаку, согласно последните препораки и забрани од Владата на Македонија за превенција од вирусот ковид-19, Комисијата за младински фудбал донесе одлука сите натпревари во младинските конкуренции и натпреварите од Детските лиги на ФФМ да се суспендираат во наредните две седмици, информираат од федерацијата.