Собранието на следната седница ќе треба да ја констатира оставката на пратеникот од редовите на ДУИ, Флорин Бесими, кој се повлекува од пратеничката функција оти брат му Фатмир е номиниран за министер.
Пратеничкото место на Бесими ќе го заземе Фазли Бедри од ДУИ, кој е следен на листата за кандитати за пратеници на интегративците од шестата изборна единица.
Државната изборна комисија во рок од три дена по оставката треба да го извести Фазли Бедри дека влегува во парламентот. Доколку, пак, Бедри во следните осум дена не потврди дека го прифаќа мандатот за пратеник, ДИК мандатот ќе го додели на следниот на листата кандидати за пратеници од редовите на ДУИ.
Претходно, Антикорупциската комисија излезе со став дека пратеникот Флорин Бесими не смее да го бира својот брат Фатмир Бесими за министер во новата Влада.
Пратеничкиот глас на Флорин Бесими беше четврти глас од ДУИ кој висеше за изборот на новиот владин состав.
Деновиве се пишува за несогласувањата во редовите на ДУИ во однос на дел од кадровските решенија што лидерот Али Ахмети ги предлага за новата Влада. Револтот се однесува најмногу на кандидирањето на Артан Груби за вицепремиер и Бујар Османи за министер за надворешни работи.
Несогласувањата се најизразени кај партиските ограноци на ДУИ во Чаир и во Сарај. Со тоа во прашање се гласовите за поддршка на новата Влада на Изет Меџити и уште една пратеничка од Чаир, како и гласот на Арбен Зибери од огранокот во Сарај.
Со договорот за коалицирање меѓу лидерите на СДСМ, ДУИ и ДПА, Зоран Заев, Али Ахмети и Мендух Тачи, парламентарното мнозинство треба да брои 62 пратеници, а за избор на владиниот состав се потребни најмалку 61 глас во Собранието.