Сепак, како што вели претседателот на Советот на јавни обвинители Антонио Јолевски, ќе се бара потврда за веродостојноста на информацијата
Претседателот на Советот на јавни обвинители Антонио Јолевски во изјава за МИА информира дека по електронска пошта добиле известување за повлекување на кандидатурата на обвинителката Фатиме Фетаи за шеф на Вишото јавно обвинителство-Скопје.
Сепак, како што вели Јолевски, ќе се бара потврда за веродостојноста на информацијата.
„Добивме мејл, но официјална потврда или негација нема. Јас побарав да ми се јави, но сè уште немам повратна информација“,
изјави Јолевски за МИА.
Изборот на нов шеф на скопското Вишо јавно обвинителство беше на дневен ред на 70. седница на Советот на јавни обвинители во понеделникот на 14 ноември, но кога стигна оваа точка, беше одложена за, како што беше посочено, членовите да имаат доволно време за разгледување на досиејата на кандидатите. Продолжението е закажано за в понеделник, 21 ноември.
Во трка за шеф на Вишото јавно обвинителство-Скопје има тројца кандидати. Обвинителката Фатиме Фетаи, постојниот обвинител Мустафа Хајрулахи и Бурим Рустеми.