Лицето што украде неколку лаптопи и компјутерска опрема од канцелариите во Кавадарци на иницијативата „Донирај компјутер“ е пронајдено, соопшти сопственикот Борче Стаменов. Украдените компјутери наменети за донирање ќе бидат вратени в понеделник.
Веста за кражбата и обивањето на канцелариите ја сподели Стаменов во понеделникот, а во интервју за „Мета“ рече дека штетата се проценува на околу 2 500 евра. Крадецот, според него, ја искористил транспарентноста на социјалните мрежи и добро знаел што да земе.
„Само неколку дена откако напишавме дека ќе направиме пауза за одмор ни се случи кражбата. Крадецот добро знаел што да земе. Тие компјутери ни беа едни од најдобрите и ги подготвуваме за потребите на добри студенти кои ќе можат да им ги искористат потенцијалот и перформансите. Имаме случаи кога со донираните компјутери, не само што завршиле факултет туку и работат и сакавме таа приказна да продолжи, да им помогнеме на што повеќе млади да направат импакт и за себе и за општеството“,
вели Стаменов за „Мета“.
„Донирај компјутер“ е хуманитарна иницијатива која постои околу седум години, а се популаризира за време на ковид-пандемијата кога многу ученици и деца од социјално ранливи категории немаа компјутери за следење онлајн наставата. Досега, според податоците на Фејсбук, преку иницијативата се донирани околу 2 500 компјутери.