Изминатите шест месеци е спроведено истражување на повеќе од 12 000 луѓе, како и клинички испитувања во Јужна Африка
„Фајзер“ и „Бионтек“ денеска објавија дека нивната вакцина против коронавирус е успешна во повеќе од 91 процент од случаите.
Ова, според американската компанија“ е резултат на истражување спроведено во изминатите шест месеци на повеќе од 12 000 луѓе.
Исто така се истакнува дека вакцината е ефикасна без оглед на возраста, расата и полот, пренесува Ројтерс.
Лабораториите на двете компании објавија дека нивната вакцина е многу ефикасна против јужноафриканската мутација на вирусот, што е утврдено врз основа на клиничките испитувања во Јужна Африка.
„Во Јужна Африка, не е забележан случај на ковид-19 кај лица вакцинирани за време на третата фаза од студијата, во која учесниците се следени шест месеци по примањето на втората доза на вакцината“,
се вели во соопштението на лабораторијата.
Во студијата учествувале 800 лица, а регистрирани се девет случаи на ковид-19, сите од плацебо – групата, што укажува на тоа дека вакцината е 100 процентна ефикасна, објаснуваат од двете компании.
Угур Сахин, извршен директор и коосновач на „Бионтек“ изјави дека првите клинички резултати покажуваат дека вакцината може ефикасно да заштити од сегашните варијанти, што е важен фактор за постигнување колективен имунитет и ставање крај на оваа пандемија.
Во третата фаза испитувања во неколку земји, вакцината покажа ефикасност од 91,3 проценти кај 46 307 учесници.
Од 927 симптоматски случаи на ковид-19 во студијата, 850 случаи биле од плацебо – групата и 77 случаи од вакцинираната група.
„Фајзер /Бионтек“ планираат да произведат 2,5 милијарди дози од вакцината оваа година.