Министерката за финансии, пак, смета дека со измената на Уредбата за субвенционирање плати во стопанството ќе се поттикнат компаниите, доколку имаат отпуштено работници над предвидениот процент, да ги вратат на работа ако сакаат да аплицираат
Мерката на Владата за финансиска поддршка на компаниите од 14 500 денари по вработен треба да се доосмисли, така што ќе се утврдат конкретни критериуми под кои може да се дозволи намалување на бројот на вработени во една компанија, сметаат од „Фајнанс тинк“.
Оттаму укажуваат дека начинот на кој мерката е (ре)дизајнирана отвора простор за нејзина компромитација, во насока на максимизирање на отпуштањето на вработените според дадените максимални лимити на мерката. Ова, како што велат, особено ќе се рефлектира врз работниците на определено работно време.
Затоа „Фајнанс тинк“ апелира мерката да се доосмисли, со допуштање намален број работници по нејзиното користење само во случаи на:
- пензионирање на работник;
- смрт на работник;
- отказ на договорот за вработување од страна на вработениот (член 79 од Законот за работни односи);
- отказ на договорот за вработување од страна на работодавачот поради кршење на работниот ред и дисциплина или работните обврски без отказен рок (член 82 од ЗРО, документирано во дисциплинска постапка);
- спогодбено преземање работник(ци) кај друг работодавач;
- престанување на важноста на договорот за вработување врз основа на судска пресуда (член 102 од ЗРО);
- престанување на важноста на договорот за вработување поради трајна неспособност за работа (член 103 од ЗРО).
Министерката за финансии Нина Ангеловска, пак, денеска појасни дека со измената на Уредбата за субвенционирање плати во стопанството ќе се поттикнат компаниите, доколку имаат отпуштено работници над предвидениот процент од пет, 10 и 15 проценти, да ги вратат на работа ако сакаат да аплицираат. Во случај, пак, кога некој од работниците доброволно заминал од работа или се работи за сезонски работници, тогаш компанијата ќе може да аплицира за мерката.
„Ние навистина се трудиме да го заштитиме секое работно место и промената во уредбата е точно во насока на заштита на работните места. Сметам и се надевам дека се работи за одредено недоразбирање или би рекла избрзана реакција“,
изјави денеска Ангеловска по вчерашните реакции на синдикатите и здруженијата на граѓани за заштита на работничките права.
Според неа, не држат обвинувањата дека на ваков начин ќе се стимулираат отпуштања на работници.
„Која влада, која држава сака да помогне да останат работници без работа. Сепак, тие работници ќе ги згрижиме во системот. Ќе им овозможиме да имаат средства за живот“,
рече Ангеловска.