Фабриките ќе работат и за време на полицискиот час организирано во смени, а работниците ќе се движат со посебни дозволи за вршење на сменска и ноќна работа, информираат од Владата по донесената одлука од кризниот штаб.
Дозволите треба да ги обезбедат работодавците или одговорните лица во компанијата. Во неа треба да се наведуваат основните податоци за работникот, адресата на живеење, работното место и смената во којашто е ангажиран работникот. За валидност на дозволата се пополнува и називот на компанијата во којашто лицето работи, а треба да го содржи и меморандумот на компанијата како и потпис и печат од одговорното лице во компанијата.
„Ги потсетуваме правните лица на законската обврска за пријава на ноќна работа. Имено, согласно член 127 од Законот за работните односи, работодавачот кој користи работници за ноќна работа во ноќна смена меѓу 22:00 часот и 6:00 часот, должен е да ја извести инспекцијата на трудот (Државен инспекторат за труд)“,
се вели во соопштението.
Компанијата има обврска да се грижи за здравјето на работниците, а Владата апелира да се почитуваат мерките за заштита на работниците во услови на епидемија од коронавирусот. Инспекциските служби се на терен и ќе го следат почитувањето на препораките.
Во погоните каде непосредно се врши производниот процес да се лимитира бројот на вработени до таа мера да работниците бидат на растојание од 1,5 до 2м. Во самиот погон задолжително да се обезбеди средство за дезинфекција нa раце и работни површини. За време на работното време од страна на вработените да се почитуваат општите препорачани мерки за повисоко ниво на лична и општа хигиена. Да се врши почесто проветрување на работните простории односно повеќе пати во текот на денот и доколку е тоа можно.
„Еднаш неделно да се врши дезинфекција на сите работни простории, особено во погоните, од овластена служба за тоа. Во случај на непосреден контакт со позитивен лабораториски потврден случај на КОВИД-19 (со или без симптоми), лицето веднаш се изолира и се пријавува до надлежен Центар за јавно здравје. Да се избегнува контакт на вработените лица од погоните меѓу себе во текот на работниот процес, а особено со административните службеници“,
се вели во владиното соопштение.
Во случај на потреба од административна работа, потпишувањето на хартиени документи да се спроведува исклучиво преку едно одредено лице кое носи лична заштитна опрема на себе (заштитна маска и ракавици). Лицата задолжени за обезбедување на објектот да носат исто така лична заштитна опрема. Возачите кои дистрибуираат готови производи, репроматеријали, хартиени документи, исто така да носат лична заштитна опрема и да не се одржуваат состаноци/колегиуми туку да се спроведуваат по телефон или на меил.