Урсула фон дер Лајен е номинирана за функцијата претседател на Комисијата, Каја Калас, треба да биде потврдена за висок претставник на Европската Унија за надворешна политика и безбедност, а Антонио Коста е избран за претседател на Европскиот совет
Лидерите на Европската Унија ја предложија Урсула фон дер Лајен за кандидат за претседател на Европската комисија, Каја Калас, за висок претставник на Европската Унија за надворешна политика и безбедност и го избраа Антонио Коста за претседател на Европскиот совет, објави актуелниот претседател на Европскиот совет, Шарл Мишел.
Според него, Европскиот совет ја манифестирал својата одговорност со тоа што ја донесе ваквата важна, есенцијална и тешка одлука и успеа да го заврши Самитот во еден ден минувајќи ги сите точки од дневниот ред, иако беше планирано тој да трае два дена.
„Мисијата е завршена. Европскиот совет испорача. Имавме важна тема што требаше да ја завршиме и ние го направивме тоа. Со номинациите е испратен моќен сигнал, моќен европски демократски сигнал, бидејќи ги зедовме предвид изборните резултатите“,
рече Мишел на прес-конференција по завршување на Самитот на ЕУ.
За вчерашната одлука на лидерите на ЕУ, преку социјалните мрежи, информираше и полскиот премиер Доналд Туск.
„Каја, Урсула и Антонио прифатија! Планот за одбрана е прифатен! Задоволство. За Полска и за Европа“,
напиша Туск на социјалната мрежа Икс.
Kaja, Ursula and Antonio accepted. Defence plans accepted. Satisfaction. For Poland and for Europe.
— Donald Tusk (@donaldtusk) June 27, 2024
Фон дер Лајен изрази благодарност до лидерите на ЕУ за нејзината номинација за втор мандат како претседателка на Европската комисија.
„Почестена сум и воодушевена што овој специјален момент можам да го споделам со мојот драг пријател Антонио Коста, но исто така и со мојата драга пријателка Каја Калас, која ќе биде и потпретседателка на Европската комисија“,
додаде Фон дер Лајен.
Grateful to Leaders for endorsing my nomination for a second mandate.
— Ursula von der Leyen (@vonderleyen) June 27, 2024
Delighted to share this moment with my friends Antonio Costa & Kaja Kallas.
Now I will seek confirmation from the European Parliament, after presenting my political guidelines ↓ https://t.co/bqxlFptq7b
Таа нагласи дека сега очекува Европскиот парламент да го потврди нејзиниот избор, откако таа претходно пред европратениците ќе ги презентира своите политички насоки за следните пет години.
Новоизбраниот претседател на Советот на ЕУ, Коста во обраќање на прес-конференцијата преку видео конференциска врска, им се заблагодари на европските лидери за укажаната доверба со неговиот избор.
Тој изрази задоволство што ќе биде дел од тимот со Фон дер Лајен и Калас, кои како што рече, се „извонредни Европејки“.
„Сигурен сум дека нашата соработка ќе биде многу успешна во служењето на Европа и на европските граѓани. Европа и светот се соочуваат со предизвикувачки момент, но Европската унија ја манифестираше својата отпорност, секогаш наоѓајќи ја силата во единството. Изградбата на единството меѓу сите земји членки ќе биде мој главен приоритет кога ќе ја преземам функцијата во декември“,
истакна Коста.
Естонската премиерка Каја Калас порача дека е почестена што е номинирана за кандидат за следен висок претставник на ЕУ за надворешна политика и безбедност, нарекувајќи го тоа огромна одговорност.
„Мора да продолжиме да работиме заедно за да обезбедиме Европа да биде ефективен глобален партнер за да ги одржуваме нашите граѓани слободни, безбедни и просперитетни“,
напиша Калас во објава на Икс.
Honoured to be nominated as the candidate for High Representative of the EU for Foreign Affairs and Security Policy. Your trust means a lot.
— Kaja Kallas (@kajakallas) June 27, 2024
We must continue working together to ensure Europe is an effective global partner to keep our citizens free, safe and prosperous. pic.twitter.com/pbQEWjGjA2
Именувањето на Фон дер Лајен на функцијата претседател на Комисијата сега мора да биде потврдено од Европскиот парламент со мнозинство гласови од вкупниот број европратеници.
Калас треба да биде потврдена од претседателот на Комисијата, што е формалност. Таа, исто така, ќе се појави пред европратениците наесен, иако тие не можат да ја отфрлат како висок претставник на ЕУ за надворешни работи, пишува „Гардијан“.
Од друга страна, самиот Европски совет го избира својот претседател.
Италијанската премиерка Џорџа Мелони, според пишувањата на „Гардијан“, гласала против изборот на Калас и Косте, додека таа била воздржана за прашањето за Урсула фон дер Лајен.
Пред официјалното гласање за новите функционери на Европската Унија, лидерите на земјите членки преговараа за кандидатите и беа избрани овие три имиња.