Конечниот нацрт на новите мерки, вклучително и ограничувањето на цената на нафтата, се очекува да биде потпишан денеска или утре
Претставниците на земјите членки на Европската Унија постигнаа политички договор за нов пакет санкции кои вклучуваат ограничување на цената на нафтата, на што некои членки досега се противеа.
Ова е осми пакет санкции од почетокот на војната во Украина. Овој пат беа поставени правните основи за воведување ограничувања на цената на нафтата, за што се договорија земјите од Г-7, но не и Европската Унија.
Сè уште не е позната точната цена која ќе биде одредена. Конечниот нацрт на новите мерки, вклучително и ограничувањето на цената на нафтата, се очекува да биде потпишан денеска или утре. Во секој случај, тој ќе биде потпишан пред средбата на лидерите на земјите членки на Унијата, која почнува во четврток во Прага.
Забраната за најголем дел од увозот на сурова нафта од Русија ќе стапи во сила во декември. Увозот на јаглен веќе е укинат, а испораките на гас од Русија во Европа се строго ограничени – прво поради игрите на моќ на Путин, а потоа и поради саботажата на двата подморски гасоводи „Северен тек“.
Сепак, претставници на неколку земји членки изразија загриженост за влијанието на новите мерки врз нивната економија. Малта, Грција и Кипар, чии флоти танкери носат најголем дел од руската нафта, беа загрижени за можното влијание на мерката врз нивните поморски индустрии. На Малта, Грција и Кипар, меѓу другите, ќе им биде дозволено да извршат проценка на влијанието на мерките.
Претходно, рускиот претседател Владимир Путин и се закани на Европа поради најавите за ограничување на цената на руските енергетски производи. Воедно рече дека ќе ја прекине испораката на сите енергетски производи доколку продолжат санкциите.
Пакетот санкции против Москва пред неколку дена беше предложен од претседателката на Европската комисија Урсула фон дер Лајен, откако рускиот претседател се закани со нуклеарно оружје и мобилизираше стотици илјади резервисти.
„Русија ја засили ескалацијата на војната во Украина на ново ниво. Лажните референдуми организирани на териториите што ги окупираа се незаконски обид за заземање на земјата и насилна промена на меѓународните граници, а ние не ги прифаќаме овие лажни референдуми“,
изјави претседателката на Комисијата Урсула фон дер Лајен.
Новиот пакет санкции вклучува додавање на уште 1 300 физички и правни лица на листата на санкции, сеопфатна забрана за увоз, што ќе ја лиши Русија од приход од 7 милијарди евра, забрана за извоз на неколку клучни технологии во Русија, ограничување за цените на нафтата за трети земји.