Денеска се одржа првото рочиште по тужбата што ЕУ ја поднесе против компанијата поради тоа што не испорача навреме вакцини против ковид како што било договорено
Европската Унија денеска ја обвини „Астра Зенека“ пред судот дека дури не се обидела да го исполни склучениот договор за испорака на вакцини против ковид-19 и дека не предупредила навреме дека ќе има големи прекини во испораките.
ЕУ поднесе тужба против „Астра Зенека“ во април, откако компанијата објави дека ќе се обиде да испорача само 100 милиони дози од својата вакцина до крајот на јуни, наместо 300 милиони предвидени со договорот за набавка и побара испорака на најмалку 120 милиони вакцини до крајот на јуни.
Компанијата, пак, тврди дека договорот не е целосно обврзувачки и дека со него се бара само да вложи напори за испорака на потребните вакцини до Унијата.
Адвокатот на ЕУ, Рафаел Џаферали, денеска на првото рочиште пред судот во Брисел рече дека овој принцип не е почитуван затоа што компанијата не испорачала 50 милиони дози произведени во фабрики што се наведени во договорот како добавувачи во ЕУ, вклучувајќи 39 милиони произведени дози во Британија.
„Астра Зенека“, пак, го оправдува недостатокот на резерви во Велика Британија со клаузули од нејзините британски договори кои спречуваат извоз на вакцината што ја разви со Универзитетот во Оксфорд. Џаферали рече дека „Астра Зенека“ се обврзала во договорот со ЕУ дека нема да има други ангажмани што би ја спречиле да се придржува кон условите на договорот.
Адвокатот, исто така, рече дека „Астра Зенека“ не ја известила ЕУ навремено за големината на проблемот со снабдување, бидејќи неколку пати испраќала пораки, вклучително и јавно, дека е во можност да ги исполни своите цели, пред конечно да признае дека има големи недостатоци во март.
Компанијата ја предупреди ЕУ во декември за проблеми со производството, но објави на крајот на јануари, непосредно пред почетокот на испораките, дека ќе има значително поголеми намалувања отколку што првично се очекуваше во првиот квартал.
Адвокатите на ЕУ побараа судска пресуда пред крајот на јуни за да се обезбеди исчезнатите дози да бидат доставени навреме.