Европската Унија се солидаризира со Јапонија и Јужна Кореја, изјави претседателот на Европскиот совет Шарл Мишелм кој го осуди лансирањето на севернокорејската ракета, нарекувајќи го неоправдана агресија и кршење на меѓународното право
Лансирањето на ракетата наиде и на осуда од САД
Европската Унија и САД остро го осудија севернокорејското лансирање балистичка ракета над Јапонија, кое се случи денеска првпат по пет години.
Претседателот на Европскиот совет Шарл Мишел остро го осуди лансирањето на балистичката ракета над Јапонија, нарекувајќи го неоправдана агресија.
„Остро го осудуваме намерниот обид на Северна Кореја да ја загрози безбедноста во регионот со истрелување балистичка ракета над Јапонија“,
пишува Мишел на Твитер.
Тој овој потег го опиша како бесрамно кршење на меѓународното право и додаде дека Европската Унија се солидаризира со Јапонија и Јужна Кореја.
Медиумите во источна Азија денеска објавија дека вооружените сили на Северна Кореја утринава по локално време истрелале балистичка ракета со среден дострел, која прелетала низ јапонскиот воздушен простор и поминала околу 4 600 километри пред да се урне во водите на Тихиот Океан.
Лансирањето на ракетата наиде и на осуда од САД.
Тие го осудија севернокорејското истрелување балистичка ракета над Јапонија како „опасно и непромислено“ и ветија дека ќе ги бранат Јужна Кореја и Јапонија со сета американска моќ, но рекоа дека остануваат отворени за дијалог со Пјонгјанг.
„Оваа акција е дестабилизирачка и го покажува бесрамното непочитување на резолуциите на Советот за безбедност на Обединетите нации и меѓународните безбедносни норми“,
рече портпаролката на Советот за национална безбедност на Белата куќа, Адриен Вотсон, јави Ројтерс.
Таа рече дека американскиот советник за национална безбедност Џејк Саливан разговарал со своите јапонски и јужнокорејски колеги за да разговараат за соодветните и силни заеднички и меѓународни одговори.
Лансирањето на ракетата од Северна Кореја доаѓа откако минатата недела Јапонија, САД и Јужна Кореја за првпат од 2017 спроведоа заеднички поморски вежби, на кои севернокорејскиот лидер Ким Џонг-ун, гледа како на доказ дека неговите непријатели се подготвувале за војна. И тогаш, како и сега, Северна Кореја даде сличен одговор. Прво истрела две ракети над Јапонија, а една недела подоцна имаше и нуклеарна проба.