ЕУ и меѓународната заедница треба јасно да ги кажат последиците од непочитувањето на Преспанскиот договор, вели Ципрас

Според поранешниот грчки премиер, треба да се води активна борба против национализмот и дестабилизацијата во регионот, а тоа, како што посочи, пред сè, значи поддршка на Договорот од Преспа, како и динамична дипломатска улога на Европската Унија за поддршка на земјите од Западен Балкан

Европската Унија и меѓународната заедница треба јасно да ги кажат последиците кои непочитувањето на Преспанскиот договор ќе ги има врз регионот, а особено врз иднината на Северна Македонија. Ова вчера го изјави поранешниот грчки премиер Алексис Ципрас кој учествуваше на Комитетот за Западен Балкан на Советот на Европа, каде што фокусот на разговорите бил ставен на важноста од Договорот од Преспа за мирот, стабилноста и европската перспектива на Западен Балкан, пренесува грчкиот медиум „Прототема“.

На средбата присуствуваше и поранешниот грчки премиер Јоргос Папандреу, кој истакна дека се додека регионот е ранлив и на националистички конфронтации, ќе тоне во нестабилност и нови конфликти. Според него, потребно е земјите да го почитуваат принципот на добрососедство посочувајќи на важноста од Преспанскиот договор.

Заев и Ципрас организираат дводневна конференција во Атина по повод шестгодишнината од потпишувањето на Преспанскиот договор

Според Ципрас, треба да се води активна борба против национализмот и дестабилизацијата во регионот, а тоа, како што посочи, пред сè, значи поддршка на Договорот од Преспа, како и динамична дипломатска улога на Европската Унија за поддршка на земјите од Западен Балкан.

На крајот тој укажа на потребата меѓународната заедница, а особено ЕУ, јасно да ги разјаснат последиците што непочитувањето на Договорот ќе ги има врз регионот, а особено врз иднината на Северна Македонија.

На средбата учествуваа и професорите Константинос Филис од Грција и Кристијан Фидановски од Северна Македонија.

Заев и Ципрас повикаа да се почитува Договорот од Преспа и ѝ порачаа на ЕУ да води активни политики за европската перспектива на Западен Балкан

Експремиерите на С Македонија и Грција, Зоран Заев и Алексис Ципрас, на 17 и 18 јуни годинава во Атина организираа Меѓународна конференција за мир и одржлив развој по повод шестгодишнината од потпишувањето на Преспанскиот договор.

Настанот беше во организација на фондацијата „Заев“ и институтот „Алексис Ципрас“.

Заев и Ципрас со заедничка колумна: Новото раководство во С Македонија го крши словото и духот на Договорот од Преспа

Оваа дводневната конференција претходно беше најавена со заедничка колумна на Зоран Заев и Алексис Ципрас, во која повикаа ЕУ и меѓународната заедница да стават до знаење оти почитувањето на Договорот од Преспа е единствениот пат на земјава до пристапниот процес.