Според најавата од ЕУ, врз основа на овој мандат чешкото претседателство ќе ги започне преговорите со Европскиот парламент
Амбасадорите на земјите-членки на Европската унија (ЕУ) денеска го договорија преговарачкиот мандат на Советот на ЕУ за регулативата за безвизно патување за имателите на пасоши издадени од Косово.
Според најавата од ЕУ, врз основа на овој мандат чешкото претседателство ќе ги започне преговорите со Европскиот парламент.
Јан Липевски, министер за надворешни работи на Чешка, чија земја претседава со Европската Унија, оцени дека денешната одлука претставува важен чекор кон безвизно патување за Косово.
„Се надеваме дека брзо ќе постигнеме договор со Европскиот парламент за да го направиме ова ветување реалност. Визната либерализација е овозможена со напорите на Косово да ја зајакне граничната контрола, управувањето со миграцијата и безбедноста, и веруваме дека оваа добра соработка само ќе стане посилна во иднината“,
рече чешкиот министер за надворешни работи Јан Липевски.
На имателите на косовски пасоши ќе им се овозможи да патуваат во ЕУ без виза за период од 90 дена во кој било период од 180 дена. Според ставот на Советот на ЕУ, ослободувањето од условот за виза би се применувало од датумот на започнување со работа на Европскиот систем за информации и овластувања за патување (ETIAS), а во секој случај до 1 јануари 2024 година.
Договорениот рок за функционирање на ETIAS е ноември 2023 година. Во случај овој систем да биде целосно функционален во дадениот рок, тоа значи дека визната либерализација за Косово исто така би стапила на сила во исто време.