ЕУ ги прекина сите летови за Русија, но Русите сè уште можат да влезат во тие земји по копнен пат и потоа да летаат низ остатокот од Европа
Премиерките на Естонија и на Финска, Каја Калас и Сана Марин, ги повикаа европските земји да не издаваат туристички визи на Русите, велејќи дека не треба да го поминуваат својот одмор во Европа додека нивната земја ја напаѓа Украина. Некои земји од ЕУ, вклучително и Летонија, веќе престанаа да издаваат визи за Русите поради војната.
„Посетата на Европа е привилегија, а не човеково право“,
напиша Калас на Твитер.
Stop issuing tourist visas to Russians. Visiting #Europe is a privilege, not a human right. Air travel from RU is shut down. It means while Schengen countries issue visas, neighbours to Russia carry the burden (FI, EE, LV – sole access points). Time to end tourism from Russia now
— Kaja Kallas (@kajakallas) August 9, 2022
„Авиосообраќајот од Русија е прекинат. Ова значи дека додека земјите од Шенген издаваат визи, соседите на Русија го носат товарот како единствени пристапни точки. Сега е време да се запре туризмот од Русија“,
напиша Калас.
Еден ден претходно, Марин за финските медиуми изјави дека „не е во ред што додека Русија води брутална агресивна војна во Европа, Русите можат да патуваат во Европа, да бидат туристи“.
Естонија и Финска се членки на ЕУ и се граничат со Русија. ЕУ ги прекина сите летови за Русија, но Русите сè уште можат да влезат во тие земји по копнен пат и потоа да летаат низ остатокот од Европа.
Украинскиот претседател Володимир Зеленски оваа недела побара меѓународна помош и го повика Западот да го забрани влезот на сите Руси со цел да ја обесхрабри Москва да продолжи со анексијата на украинските територии.
,,Му кажуваш на целиот свет дека мора да живее според твоите правила. Потоа живеј таму. Ова е единствениот начин да се влијае на Путин“, рече Зеленски.
Кремљ ги нападна европските критичари, вклучително и лидерите на земјите од ЕУ и Украина, поради нивните повици на сите Руси да им се забрани влезот на Запад.
Дмитриј Песков, портпаролот на претседателот Владимир Путин, рече дека „ова е ирационално размислување“ и дека „секој обид да се изолираат Русите или Русија е процес кој нема перспектива“.
„Мислам дека со текот на времето некако ќе се манифестира здравиот разум и ќе се вразумат оние кои дадоа такви изјави“,
рече Песков.