Најповолна цена за бараниот период е еден од критериумите според кој ќе се избира понудувачот кој ќе ги снабдува топланите во Скопје. Од компанијата очекуваат договорот за набавка на природен гас да биде склучен кон крајот на декември
ЕСМ Продажба почна постапка за набавка на природен гас за потребите на топланите за греење на градот Скопје за периодот јануари-април, соопштија денеска од државната компанија Електрани на Северна Македонија.
Целта на повикот, како што се наведува во соопштението, е да се изберат квалификувани понудувачи со кои ќе се склучи рамковен договор за потребните количини на природен гас за периодот од 1 јануари до 30 април 2023 година.
„Испратени се покани за достава на понуди до активните лиценцирани компании за трговија и снабдување со природен гас во Република Северна Македонија и повикот е објавен и на веб страната на АД ЕСМ, во делот на ЕСМ Продажба, за деловно информирање на странски компании кои би имале интерес да поднесат понуди“,
стои во соопштението од АД ЕСМ.
Најповолна цена за бараниот период е еден од критериумите според кој ќе се избира понудувачот кој ќе ги снабдува топланите во Скопје. Од компанијата очекуваат договорот за набавка на природен гас да биде склучен кон крајот на декември.
„Индивидуален договор, месечен или за целиот период, ќе се склучи со квалификуваниот понудувач кој има рамковен договор и најповолна цена за бараниот период. Се очекува конечен договор за набавка на природен гас да биде склучен кон крајот на декември“,
велат од АД Електрани на Северна Македонија.
За месец декември ЕСМ обезбеди природен гас за топланите од Макпетрол пром – гас и топлинска енергија од ТЕ-ТО.
Инаку, државната компанија за греење на скопјани изминатите месеци склучува договори за набавка на природен гас во покуси временски периоди, поради, како што изјавија неодамна од ЕСМ, финански подобри услови.