Премиерот Димитар Ковачевски изјави дека денеска треба да завршат преговорите меѓу раководствата на топланата „Север“ и ЕСМ и да потпишат договор за соработка
„Електрани на Северна Македонија“ ќе го преземат управувањето со топланата „Север“ што ги снабдува со топлинска енергија граѓаните во општините Чаир и Бутел, како и институциите, училиштата и градинките во овие општини.
Премиерот Димитар Ковачевски изјави дека денеска треба да завршат преговорите меѓу раководствата на топлана „Север“ и ЕСМ и да потпишат договор за соработка.
„Денеска во 13 часот раководството на топланата ‘Север’ ќе биде во ЕСМ каде што треба да ги завршат преговорите со ЕСМ, да потпишат договор за деловно-техничка соработка и да се обезбеди затоплување на граѓаните во општините Чаир и Бутел, како и на институциите градинките и школите, со оглед дека ЕСМ ќе го преземат затоплувањето и на тој дел“,
изјави Ковачевски одговарајќи на новинарски прашања за време на денешната посета на Кавадареччко каде што заврши изградбата на магистралната гасоводна делница.
И тој, како и ЕСМ претходно, ги демантира информациите дека е можно скопјани утре да останат со ладни радијатори бидејќи наводно резерви на гас има само за уште денеска, а нови набавки не се најавени.
„Тоа не е точно затоа што пред три дена ЕСМ имаше склучено договор за набавка на гас од ‘Макпетрол’ и за цел декември е обезбедено затоплување на Градот Скопје“,
изјави Ковачевски.
Во врска со производството на електрична енергија, Ковачевски изјави дека веќе пристигнува опремата и се обезбедуваат дозволите за транспорт на 300 тони опрема – трансформатор од Труција, а привршуваат и ремонтите во ТЕЦ „Осломеј“ кој треба да биде ставен во функција.
„Завршуваат работите на генераторот во ТЕЦ ‘Неготино’ кој исто така треба да биде ставен во функција. Владата има обврска прво да обезбеди затоплување на граѓаните на Град Скопје од две причини за да може да се загреат и второ електродистрибутивната мрежа на град Скопје е направена компатибилно со затоплувањето на централно греење. Ако не е централното греење и ако 60 000 домаќинства во неколкуте општини се приклучат на средства за затоплување тогаш ќе дојде до пад на електродистрибутивната мрежа во градот Скопје“,
рече Ковачевски.
Премиерот нагласи дека со ставање на сите капацитет во погон ќе се намали потребата од увоз на електрична енергија и порача дека граѓаните не треба да се грижат бидејќи до крајот на годината се обезбедени средства за енергенси, а средства за надминување на енергетската криза се предвидени и во буџетот за 2023 година.
Тој ја повика опозицијата да не блокираат закони кои се однесуваат на енергетиката.
„Сакам да ја повикам опозицијата дека не смеат да блокираат закони во делот на енергетиката. Има седум закони кои се однесуваат и на дел од инвестициски проекти за гасоводот, на Коридорот 8 и тие ги блокираат само од политички причини. Треба да престанат со тоа и да работат за државата. Блокираа 100 милиони евра кредит од Европската банка, со најниска можна каматна стапка, само заради пусти политички поени“,
рече Ковачевски.