Министерството за здравство во Газа објави дека бројот на убиени Палестинци од почетокот на конфликтот со израелската армија се искачи на 53, вклучително и четиринаесет деца
Израелската служба за безбедност Шин Бет идентификуваше четворица команданти на Хамас убиени во заедничка операција со израелската армија
Денеска од Тел Авив се слушаа сирени од раните утрински часови. Одекнаа и неколку експлозии. Израел изврши неколку десетици воздушни напади за неколку минути, насочени кон безбедносните инсталации во Газа. Според Би-би-си најмалку 48 Палестинци, од кои 14 деца и шест Израелци, се убиени во досегашните судири, соопштија здравствените власти.
Израелскиот премиер Бенјамин Нетанјаху најави дека ќе ги интензивира нападите врз Газа, додека претставникот на ООН за Блискиот исток повика на прекин на огнот и предупреди дека „цената на војната ја плаќаат обичните луѓе“.
Главниот обвинител на Меѓународниот кривичен суд предупредува на можноста да се извршени кривични дела. Свикан е состанок на Советот за безбедност на ООН.
Во меѓувреме, израелската армија објави дека неколку високи команданти на Хамас се убиени во воздушен напад во Газа и Кан Јунис.
Во соопштението се вели дека е извршена „комплексна прва операција од ваков вид“ и дека нападите се насочени кон „ клучен дел од Генералштабот на Хамас“ кој се смета за близок до военото крило на организацијата, пренесе Асошиејтед Прес.
Израелската служба за безбедност Шин Бет идентификуваше четворица команданти на Хамас убиени во заедничка операција со израелската армија, заедно со уште двајца други кои беа убиени во претходниот напад врз базата на организацијата, пренесоа израелските медиуми., но Хамас не го коментираше тоа.
„Покрај тоа, беа убиени уште десет други оперативци кои работеа во одделот за производство, истражување и развој на оружје“,
соопшти Шин Бет.
Израелскиот министер за одбрана Бени Ганц изјави денеска дека воените операции во Појасот Газа ќе продолжат онолку време колку што е потребно.
„Израел не се подготвува за прекин на огнот. Моментно нема датум за завршување на операциите“,
истакна Ганц.
Министерството за здравство во Газа објави дека бројот на убиени Палестинци од почетокот на конфликтот со израелската армија се искачи на 53, вклучително и четиринаесет деца, до 15 часот по локално време и дека 320 жители на таа палестинска територија се ранети.
Палестинските екстремистички организации, во меѓувреме, продолжуваат да го ракетираат Израел и сирените се слушаат на југот на земјата, во пограничните населби и во Бершева и Димона, каде се наоѓа израелскиот нуклеарен реактор.
Военото крило на Хамас објави дека биле истрелани 15 ракети кон Димона и нема извештаи за повредени.