Опозициската партија обвини оти институциите имале ненавремена реакција откако било утврдено дека диви пумпи вбризгувала вода од реката Вардар во водоводот, што резултира со речиси 2 000 заболени граѓани
Епидемијата на гастроентеритис во Гостивар не избувна преку ноќ, туку се развиваше со денови пред очите на надлежните институции, се вели во соопштението на опозицискиот Социјалдемократски сојуз на Македонија (СДСМ).
Оттаму велат дека она што започнало со поединечни случаи брзо прераснало во стотици заболени дневно поради што речиси 2 000 жители биле принудени да побараат лекарска помош со симптоми предизвикани од загадената вода за пиење. Дополнително, од СДСМ велат дека институциите уште во раната фаза имале јасни информации и сомнежи за небезбедноста на водата, како и за невообичаеното зголемување на бројот на пациенти.
„Надзорот утврдил дека во главниот цевковод е поставена пумпа на диво, без одобрение, која директно вбризгувала вода од река Вардар во водоводниот систем. И покрај овие јасни предупредувачки сигнали, прогласувањето на епидемијата дојде дури откако амбулантите и болниците беа преполни, а бројот на заболени достигна речиси две илјади. Ова не е само технички или административен пропуст. Ова е прашање на политичка одговорност. Институциите имаа должност да реагираат брзо и одлучно уште кога се појавија првите сигнали“,
реагираат од СДСМ.
Јавното здравје. како што велат од опозициската партија, не смее да биде предмет на доцнење, изговори или политички калкулации, а институциите имале должност да реагираат одлучно уште при првите индиции за здравствен ризик.
„Не можеме повеќе да слушаме празни изјави од типот: ‘Многу скоро ќе се излезе со информација’, ‘За неколку дена сè ќе биде познато’, ‘Дел од нив ќе ги дознаете наскоро’, а потоа да се преправаме дека сме шокирани од тоа како е можно ова да се случило. Граѓаните на Гостивар заслужуваат одговори: зошто се чекаше толку долго и кој ќе сноси одговорност за тоа што предупредувачките сигнали не беа препознаени и пресретнати навреме“,
се вели во соопштението на СДСМ.