Европската агенција за лекови најави дека следно ќе се состане Комитетот за безбедност, а ревидирана препорака се очекува на почетокот на април
Експертската група на Европската агенција за лекови, во која има и независни надворешни експерти од низа медицински специјалности, вклучително и хематолози, невролози и епидемиолози, не идентификува никакви специфични фактори на ризик, како што се возраста, полот или претходната медицинска историја на нарушувања на коагулацијата, за последните ретки случаи на појава на тромб кај лица што биле вакцинирани со „Астра Зенека“.
Односно, како што се вели во објавата на страницата на ЕМА, каузална врска со вакцината не е докажана, но е можна и поради тоа понатамошната анализа продолжува.
Овој состанок, според ЕМА, се одржал пред два дена и се дискутирало за специфични аспекти за тоа дали може да се идентификуваат основните фактори на ризик и кои дополнителни податоци се потребни за понатамошно карактеризирање на набљудуваните настани и потенцијалниот ризик.
Денеска за ова ќе заседава и Комитетот за безбедност на ЕМА.
Од ЕМА се повикуваат на ставот од 18 март, дека придобивките од вакцината „Астра Зенека“ во спречувањето на ковид-19, со поврзаниот ризик од хоспитализација и смрт, ги надминуваат ризиците од несакани ефекти.
Исто така, посочуваат дека вакцинираните лица треба да бидат свесни за ретката можност за појава на овие многу ретки видови згрутчување на крвта. Ако имаат симптоми што укажуваат на проблеми со згрутчување, како што е опишано во информациите за производот, тие треба да побараат итна медицинска помош и да ги информираат здравствените работници за нивната неодамнешна вакцинација, велат од ЕМА.
Врз основа на сите тековно достапни податоци, Комитетот за безбедност на ЕМА се очекува да издаде ажурирана препорака за време на пленарниот состанок, кој би се одржал меѓу 6 и 9 април.
Состаноците во ЕМА се иницирани од вчерашната одлука на Германија да го прекине вакцинирањето на лица под 60-годишна возраст откако се појавиле ретки случаи на тромбоцитна реакција кај вакцинирани кои биле под 60-годишна возраст и дека девет од тие случаи завршиле фатално.
Претходно тоа го направи и Канада.
Министерот за здравство Венко Филипче денеска објави дека и кај нас има случај на тромбоцитна реакција кај 28-годишна девојка која се вакцинирала со оваа вакцина во Србија.
Во очекување на препораките од европските медицински тела, вакцинацијата со „Астра Зенека“ кај нас ќе се спроведува кај лица над 60 години.
Но Филипче беше дециден дека нема причина за паника, и посебно се обрати до оние што веќе примиле доза од оваа вакцина, при што нагласи дека се работи за ретки случаи.