Дваесет и осумгодишната девојка била вакцинирана во Србија и реакцијата ѝ се појавила 6-7 дена потоа. Таа е хоспитализирана, во добра здравствена состојба и не е критична, а немала ниту некакви хронични заболувања
Филипче кој вчера рече дека и тој ќе се вакцинира со „Астра Зенека“, денеска кажа дека останува на овој став, но прво ќе ги почека препораките
Девојка на 28 години е првиот регистриран случај кај нас со тромбоцитна реакција на вакцината на „Астра Зенека“, соопшти министерот за здравство Венко Филипче.
Таа била вакцинирана во Србија и реакцијата ѝ се појавиле 6-7 дена потоа, хоспитализирана е, во добра здравствена состојба и не е критична, а немала ниту некакви хронични заболувања.
Министерот Филипче рече дека кај нас вакцинацијата со „Астра Зенека“ ќе продолжи само кај популација над 60 години, а за другите ќе се чекаат препораки од Канада, Германија, кои први прекинаа со вакцинација на оваа популација, и од ЕМА.
„Не треба да се создава паника, само треба да се следат препораките. Утрово од Германија е препораката дека за лицата под 60 години е потребна претходна консултација од лекар пред да се прими вакцината“,
вели Филипче.
Тој рече дека засега во земјава со „Астра Зенека“ ќе се вакцинираат лица над 60 години кај кои нема вакви реакции, додека кога ќе се добијат сите информации од Канада, Германија и ЕМА, ќе се продолжи и со најавената вакцинација на лица од критичната инфраструктура, која вчера беше најавена дека ќе почне од понеделник.
На прашањето дали стравува дека е можно ваквите информации да влијаат на откажување на лица од вакцинирање, Филипче рече дека тие се должни да ги споделат сите информации, а масовната вакцинација мора да се гледа како борба против епидемијата, повторно истакнувајќи дека нема место за паника, туку само за внимателност.
До овој момент, како што рече, околу 20 отсто од пријавените не се појавиле на пунктовите за вакцинација, но истакна дека засега е премногу рано да се каже колкав ќе биде тој процент.
Денеска во земјава започна вакцинацијата на населението со вакцините на „Астра Зенека“. Таа според Филипче се одвива добро во повеќе градови и не се регистрирани никакви проблеми.
Филипче кој вчера рече дека и тој ќе се вакцинира со „Астра Зенека“, денеска кажа дека останува на овој став, но прво ќе ги почека препораките.