Ако штетата од 4 илјади евра не ја платат навивачите „шверцери“, тоа ќе треба да го стори директорката на МНТ, Симона Угриновска, порача премиерот Зоран Заев на денешната седница за пратенички прашања. Одговорноста ја лоцирале кај шефицата на институцијата затоа што немало писмен договор со организаторот, туку само устен.
„Нема договор. Значи да биде чисто, нема договор за таа работа во 21 часот. Направен е устен договор затоа што немало и време кога да се направи. Рефлексијата на тоа е и материјалната и духовната штета и некој треба да понесе одговорност“,
рече Заев.
Тој додаде дека има правилник за наградување и санкционирање и според него Угриновска ќе биде казнета.
„Според правилникот, ќе се оцени по таа дисциплинска постапка казна ли е, бркање од работа, не знам, разрешување директор ли е. Службите ми кажаа дека е казна од плата и слично“,
додаде Заев.
Од Угриновска не добивме одговор дали ќе бара организаторите да ја исплатат штетата или тоа ќе го стори од свој џеб и како ја коментира одлуката на Владата во наредните три месеци да зема 15 % помала плата.
За професорот по административно право Борче Давитковски оваа владина одлука е спорна. Тој за „360 степени“ вели дека Владата не може да изрече дисциплинска мерка за именувано лице.
„Таа нема статус на административен службеник како прво. Владата не може да изрекува дисциплинска мерка за избрани и именувани лица. Таа може да ги казнува вработените во институцијата, а неа може да ја разреши Министерството за култура. Може да сноси само политичка одговорност“,
вели Давитковски.
Од Владата не одговорија по кој закон ја донеле одлуката за изрекување дисциплинска мерка на Угриновска, а став не добивме ниту од Министерството за култура.
Инцидентите во МНТ се случија на 22 ноември по прославата на Денот на албанската азбука. Вечерта околу 21 часот почнал вториот настан кој бил пријавен како емитување документарен филм за годишнина на навивачката група на фудбалскиот клуб „Шкупи“. На овој настан имаше недолично однесување од навивачите, при што беа оштетени и столици, инвентар и дел од ентериерот во објектот.