Пред министерот за економија Крешник Бектеши да им реферира на колегите министри и премиерот на владина седница (што би требало да се одржи наредниот вторник), од овој ресор решија денеска деталите во врска со спојувањето на концесиите за Иловица да ги споделат со новинарите. Ништо поразлично од ова нема да слушнат ни министрите, тврдат од Економија. Од ресорот на Бектеши остануваат на ставот дека одлуката за спојување на концесиите е исправна и различна од давање дозвола за експлоатација
Спојувањето на концесиите помина на 27 јуни 2023, а Владата материјалите ги добила ден претходно, што според Економија е доволно време за министрите да се запознаат за што ќе гласаат. Оттаму не знааат од каде е зачуденоста на тројцата министри на СДСМ (Каја Шукова, Оливер Спасовски и Славјанка Петровска), кои во изјава за ИРЛ велат дека не биле запознаени со суштината на предметот и бараат ревизија на одлуката
Министерството за економија е на став дека спојување на концесиите за Иловица-Штука треба да има. Оттаму денеска на брифинг за новинарите повторија дека се работи за административно спојување и тврдат дека така државата избегнува нови спорови.
Од ресорот на Крешник Бектеши велат дека двете концесиите се една целина, односно првата концесија е во самото концесиско поле на втората, што им дава законска можност на инвеститорите да побараат спојување.
Постапките за двете концесии траат со години
За првата концесија административната постапка почнала во 2005 година и завршила во 2012 со одлука за доделување концесија, потпишана од тогашниот министер за финансии Зоран Ставрески во име на Владата.
Подоцна, во 2016 г. инвеститорите побарале и дозвола за експлоатација што е следен и финален чекор, но Министерството за економија им одговорило три години подоцна и тоа негативно. На чело на ресорот економија и тогаш бил Крешник Бектеши, кој го отфрлил барањето со образложение дека инвеститорите немаат комплетна документација.
За втората концесија барањето стигнало во 2009 година. Откако ги поминало филтрите на сите надлежни институции, одлуката за доделување на концесијата ја потпишал тогашниот премиер Никола Груевски во 2015 г. Откако тој потпишал, не стигнало да се одобри и барањето за дозвола за експлоатација, велат од Економија.
Парaлелно се барало спојување на концесиите
Додека се чекале евентуалните одобренија за експлоатација, инвеститорите барале спојување на концесиите и тоа уште од 2016 година. Тогаш Министерството било на терен и утврдило дека не постои законска пречка концесиите да се спојат. На двапати досега (2018 и 2019 г.) предлогот стигнал до Владата, но одлука за спојување на концесиите немало.
Подоцна, во 2019 г., Министерството за економија го раскинува договорот за концесија со Иловица поради некомплетна документација, за што тогаш „Еуромакс” поведува постапка против Владата пред Управниот суд. Процесот се влече со години, за во 2023 г. Управниот суд во март да ја уважи тужбата за одземање на концесијата – одлука која отстапува од претходните две решенија на Судот, што инвеститорите ги обжалуваат.
Но, иако инвеститорите барале, Управниот суд не одлучувал и за спојување на концесиите, туку ценел дека тоа претставува посебно правно прашање, за кое надлежните органи (Владата и Министерството за економија) се должни да постапуваат.
По ова, Економија смета дека сега треба да се спојат концесиите, оти судскиот спор е завршен, а уште во 2016 г. и теренски утврдиле дека нема пречка за спојување на концесиите.
„Досега не доставивме предлог за спојување на концесиите до Владата оти раскинавме една концесија, немаше основа. Сега, по одлуката на Управниот суд да им ја врати концесијата, побарале спојување и ние по службена должност ги пративме целокупните материјали до Владата на одлучување. Ако направевме спротивно, ќе го прекршевме законот“,
тврдат од Економија.
Концесионерот „Еуромакс рисорсис“ зачетири години ќе треба да обезбеди документација за да може да бара дозвола за експлоатација, но тоа ќе треба да го направи по нови изменети услови во законите.
Треба докази за решени имотно-правни спорови, геодетски елаборати, студија за оцена на влијанието врз животната средина итн.
Откако и само ако ги собере сите неопходни документи и позитивни мислења од повеќе министерства и управи, ќе може да се даде дозвола за експлоатација.
Министерство за економија: Бектеши не ги изигра колегите на владина седница
Спојувањето на концесиите го помина владиниот филтер на 27 јуни 2023, а Владата материјалите ги добила ден претходно, што според Економија е доволно време за министрите да се запознаат за што ќе гласаат. Оттаму не знааат од каде е зачуденоста на тројцата министри на СДСМ (Каја Шукова, Оливер Спасовски и Славјанка Петровска), кои во изјава за ИРЛ велат дека не биле запознаени со суштината на предметот и бараат ревизија на одлуката.
Дополнително, оттаму тврдат дека за точката имало дваесетминутна расправа на самата седница. Одговорот на новинарските прашања – зошто се брзало, е дека Министерството оценило оти тогаш треба да помине.
Ресорот на Бектеши е на став дека спојувањето на концесиите е исправно и дека е различна процедура од давање дозвола за експлоатација.
Уште стопати да ги „преслушаат” велат дека би биле на истиот став.