Портпаролката на Европската комисија, Дана Спинант, не сакаше да одговори конкретно за случајот со Северна Македонија, но потсети на принципиелната позиција на Европската комисија
Европската комисија укажува дека земјите членки под ниеден услов не смеат да се мешаат во домашните работи на други земји членки на ЕУ или оние што се надвор од Унијата.
Коментарот од ЕК е на прашање на МИА, откако бугарскиот претседател Румен Радев вчера од Словенија изјави дека очекува 120 илјади граѓани да бидат попишани како Бугари во Северна Македонија.
„Повеќе од 120 000 граѓани на Република Северна Македонија се и граѓани на Република Бугарија, врз основа на нивнa изречно изразена волја и на претставени објективни документи за потекло. Други десетици илјади го чекаат својот бугарски пасош и очекуваме таа реалност да биде отсликана и при пребројувањето на населението во Република Северна Македонија“,
изјави Радев.
Портпаролката на Европската комисија, Дана Спинант, не сакаше да одговори конкретно за случајот со Северна Македонија, но потсети на принципиелната позиција на Европската комисија.
„Никогаш не е прифатливо една земја да и диктира било што на друга земја“,
рече Спинант и додаде дека во случајот со пописот во Северна Македонија доколку станува збор за методолошки прашања, Европската Комисија не коментира, но сака да се реши спорот со Бугарија што поскоро.
Спинант истакна дека претседателката на Европската Комисија, Урсула фон дер Лајен, вчера од самитот во Брдо, уште еднаш побара надминување на овој билатерален спор за да можат да започнат преговорите помеѓу ЕУ и Северна Македонија.
„Сакаме да се реши ова билатерално прашање поради кое Бугарија не прифаќа одржување на првата меѓувладина конференција со Северна Македонија“,
рече портпаролката.
Фон дер Лајен вчера се сретна со премиерот Заев и бугарскиот претседател Радев во присуство на претседателот на Европскиот совет, Шарл Мишел и словенечкиот премиер, Јанез Јанша.
„Тоа беше темата, да им се даде поттик на двете земји, за нас е многу важно да се изнајде решение за да не се одложи процесот, не коментираме затоа што разговорите меѓу двете страни продолжуваат“,
вели портпаролката на Европската комисија, Дана Спинант.
Премиерот Зоран Заев вчера изјави дека од овој самит има силни декларации и оти е во исчекување дека до крајот на годината можеме да ја одржиме првата меѓувладина конференција. За конкретното барање на бугарската страна Бугарите да се вметнат во Уставот, премиерот рече дека со тоа немаме проблем, но такво нешто би се случило пред полноправното членство во ЕУ, а не сега.
Чекорите и блокадите што ги презема бугарскиот претседател Румен Радев се навреда за македонските граѓани, изјави премиерот Зоран Заев по Самитот на ЕУ за Западен Балкан во Брдо кај Крањ, Словенија.
Премиерот рече дека по Самитот е јасно оти само Бугарија се противи на нашата европска интеграција, како и дека не е сигурен дека Радев ја разбрал порака од францускиот претседател Емануел Макрон и германската канцеларка Ангела Меркел.