Европската комисија постигна договор со американската биотехнолошка компанија „Модерна“ за набавка на нејзината вакцина против ковид-19, соопшти денеска официјален претставник на ЕУ.
Минатата недела, „Модерна“ објави дека нејзината експериментална вакцина е со 94,5 проценти ефикасност во заштитата од ковид-19, повикувајќи се на податоци од клиничка студија во подоцнежна фаза.
Во август, Комисијата, која преговара со производители на вакцини во име на земјите членки на ЕУ, соопшти дека се склучени прелиминарни разговори со „Модерна“ за потпишување договор за испорака на 80 милиони дози од својата вакцина, со можност за купување на уште 80 милиони.
Во истиот период Европската комисија објави дека ќе одвои 400 милиони евра во рамки на меѓународниот механизам Ковакс за помош при купување и испорака на дози на идни вакцини против ковид-19 за земјите со низок и среден приход.
Ковакс, кој заеднички го водат Гави, Алијансата за вакцини, Коалицијата за иновации во подготвеноста за епидемија (ЦЕПИ) и СЗО, има за цел да го забрза развојот и производството на вакцини против ковид-19, но исто така да гарантира фер и рамноправен пристап за секоја земја во светот.
Ковакс како механизам служи за осигурување на земјите кои се загрижени за обезбедување пристап до вакцини, но исто така и за производителите, сака да купи две милијарди дози до крајот на 2021 година, преговарајќи со разни добавувачи кои покриваат различни научни технологии, време на испорака и цени.