За Северна Македонија е во ред да има добрососедски односи со сите соседи, вклучувајќи ја и Србија. Но, патот за стабилност во регионот и за вашата земја е цел Западен Балкан да се движи кон НАТО и ЕУ, смета американскиот експерт за регионот
Србија е автократија, не е демократија и се движи во погрешна насока. Иницијативата Отворен Балкан, пак, токму на Србија, која е најголема економија во регионот, ѝ дава и економска слобода, а тоа значи и поголемо политичко влијание што, пак, води кон нестабилност.
Со ваква теза денеска настапи американскиот експерт Едвард Џозеф од Школата за напредни меѓународни студии при Универзитетот „Џонс Хопкинс“ од САД, кој денеска во Скопје во просториите на Министерството за надворешни работи учествуваше на годишната меѓународна конференција „Редефинирани приоритети: нови реалности по украинската криза“.
„Добра идеја е за земјите од регионот да тргуваат, но е лоша идеја тоа да се прави со режим дизајниран за зголемување на српската политичка моќ. Економската моќ е политичка моќ. Економиите во регионот не се исти, Србија ја има најголемата економија, има трговски суфицит во регионов. Србија е автократија, не е демократија, се движи во погрешна насока. На примерот со Русија и Украина гледаме што значи кога државата ја води автократ, а тоа е нестабилност. За Северна Македонија е во ред да има добрососедски односи со сите соседи, вклучувајќи ја и Србија. Но, патот за стабилност во регионот и за вашата земја е цел Западен Балкан да се движи кон НАТО и ЕУ. Србија се противи на НАТО, во смисла на тоа дека ја поддржува Русија, не применува санкции против неа, го промовира рускиот наратив. Отворен Балкан е дизајниран така што на Србија ѝ дава економска слобода, а тоа значи поголемо политичко влијание во регионот, а тоа води кон нестабилност“,
рече Џозеф одговарајќи на новинарски прашања.
Вашата безбедност, порача тој, треба да ја барате под чадорот на НАТО и ЕУ и да одржувате добри односи со сите земји.