Министерката за одбрана Славјанка Петровска оцени дека единството уште еднаш победило, откако „падна“ договор Турција да го одблокира приемот на Шведска во НАТО.
„Единството во НАТО уште еднаш победи. Постигнат е договор и Шведска да биде дел од Алијансата. НАТО-семејството се проширува на 32 членки. Побројни, помоќни, пообединети“,
напиша министерката на Фејсбук.
Претходно и министерот за одбрана Бујар Османи кажа дека ова е одлична вест и посочи дека ова е најважниот политичко-безбедносен настан, не само за Алијансата туку и за долгорочната безбедност и стабилност на Европа.
Веста за постигнатиот договор претходно ја објави генералниот секретар на НАТО, Јенс Столтенберг.
Пред да се постигне договорот, пак, турскиот претседател Реџеп Таип Ердоган го поврза членството на Шведска во НАТО со започнувањето на пристапните преговори на Турција со ЕУ поставувајќи го тоа како услов.
На ова реагираа и германскиот канцелар Олаф Шолц и американскиот Стејт департмент со порака дека Турција не треба да го поврзува едното со другото прашање.