Системот ќе овозможи автоматски да се определува кои се фирми се високо, средно и нискоризични. Распределбата на надзорите и контролите ќе биде електронска со што ќе се елиминира човечкиот фактор, најавуваат надлежните
Имплементацијата на електронскиот систем „Е-инспектор“ започнува со примена во трите клучни инспекторати: Државниот пазарен инспекторат, Државниот трудов инспекторат и Државниот управен инспекторат, информира денеска на прес-конференција вицепремиерот за борба против корупцијата Љупчо Николовски.
Другите инспекциски служби под надлежност на Инспекцискиот совет етапно ќе се приклучуваат на софтверот, така што сите 28 инспекторати ќе бидат електронски поврзани.
За трите инспекторати, каде што почнува примената, вицепремиерот посочи дека веќе се обезбедени лаптопи, неопходни за дигитално спроведување на надзорите и контролите.
„Со овој систем значително се елиминира човечкиот фактор и субјективниот пристап при инспекциските надзори и контроли. Целокупниот процес од распределба на надзорите и контролите, генерирање на записници, до крај до издавање на решенија, ќе биде електронски, со што човечкиот фактор е целосно изземен. Инспекторот не може сам по свое лично убедување да одлучува во кој објект ќе изврши надзор или контрола. Одлуката ќе ја генерира софтверот, кој врз основа на базата на податоци, автоматски ќе ги определува субјектите, фирмите на високо, средно и нискоризични и автоматски ќе планира надзори кај високо ризичните субјекти“,
рече Николовски.
Ова, според Николовски, е фер пристап, затоа што фирмите кои ги почитуваат законите и плаќаат данок, нема да бидат оптоварени со постојани редовни контроли, а оние кај кои претходно биле детектирани пропусти соодветно ќе се контролираат.
Директорката на Инспекцискиот совет, Магдалена Филиповска-Грашкоска, посочи дека до крајот на годинава вонредните надзори кои ќе се вршат од страна на овие три инспекциски служби ќе бидат водени преку системот „Е-инспектор“, а веќе од јануари 2022 година, откако ќе се донесат годишните планови за работа за 2022 и месечни планови за работа за јануари 2022, инспекторите ќе отпочнат да ги водат и редовните надзори преку овој систем.
„На овој начин, во иднина, со полнење на базата на податоци со информации за субјектите на надзор добиени од претходните надзори, во смисла дали и кои законски обврски ги исполниле или не ги исполниле, системот ќе биде во можност да ги класифицира субјектите на надзор на високо, средно и нискоризични субјекти и во зависност од степенот на ризик соодветно автоматски ќе се планираат надзорите“,
рече Филиповска-Грашкоска.
Во 2022 година, како што најавија, ќе се отпочне со доразвивање на софтверот со цел да се овозможи пристап и на уште 13 државни инспекторати, а за 2023 година се планира пристап и за сите преостанати инспекциски служби.