Ако Европскиот парламент не добие официјална покана до понеделник, нема да може да учествува во набљудувачката мисија на вонредните избори во Србија закажани за 25 октомври, јавува регионалниот сервис на „Радио слободна Европа“ (РСЕ), повикувајќи се на свои извори во европската институција
Европскиот парламент (ЕП) би бил подготвен да почека најдоцна до понеделник, 12 октомври, за официјален Белград да испрати покана за набљудување на предвремените парламентарни избори, иако рокот за прием на покани формално истече на 8 октомври, јави регионалниот сервис на „Радио слободна Европа“ (РСЕ), повикувајќи се на свои извори во европската институција.
Ако Европскиот парламент не добие официјална покана до понеделник, нема да може да учествува во набљудувачката мисија на вонредните избори во Србија закажани за 25 октомври.
Известувачот на Европскиот парламент за Србија, Тонино Пицула, во меѓувреме потврди дека Групата за поддршка на демократијата и координација на изборите на Европскиот парламент навремено поднела барање за набљудување на изборите во Србија што ќе се одржат на 25 октомври. Тој вели дека била одобрена и седумчлена делегација, но оти српските власти не поднеле официјална покана во предвидениот рок.
„Сепак, властите во Србија не го поканија Европскиот парламент да ги набљудува изборите на 25 октомври, а рокот за организирање мисија на Европскиот парламент, во меѓувреме, истече. Ова практично значи дека е пропуштена можноста за испраќање делегација за набљудување на Европскиот парламент“,
изјави Пицула за „Радио слободна Европа“.
Републичката изборна комисија на Србија денеска ја утврди збирната изборна листа за претстојните избори, на која се наоѓаат 18 партии и коалиции со вкупно 2 418 кандидати за пратеници.