Планинарите да ги следат препораките и насоките кои им ги издаваат нивните матични федерации и асоцијации, апелираат од Дирекцијата за заштита и спасување (ДЗС) откако за помалку од една недела регистрирале три случаи на залутани планинари.
Апелот кој го испраќа ДЗС вечерва преку социјалните мрежи следува откако денеска успешно биле пронајдени и евакуирани две планинарки од Националниот парк „Пелистер“ кој се движеле од местото Ниже поле кон Големо езеро.
„Од страна на СВР-Битола бевме известени дека две планинарки кои се движеле во Националниот парк ’Пелистер‘ се изгубиле и не можеле да го пронајдат патот кој водел до Големо езеро во самиот Национален парк. Службената дојава ПОЗС Битола ја доби во 10:45 со што веднаш е побарано да се исконтактира со нив. ДЗС одлучи да го активира ТБО за ЗИС на планина од Битола и да се упати кон Големо езеро во националниот парк за нивно лоцирање и успешно евакуирање. Истите се преземени од вработените од националниот парк ’Пелистер‘ и со возила се спуштени во градот Битола“,
велат од ДЗС.
Вчера, пак, на Шар Планина беше спроведена акција за спасување на група од седум планинари од Чешка кои се изгубиле на планината, еден од нив беше и со скршена рака.