Едниот протест се одржа на платото пред СРЦ „Борис Трајковски“ во организација на „Независни за Карпош – за заштита на Карпош“ со поддршка на голем дел граѓански организации и здруженија, а другиот, во организација на Левица, се одржа во близина на градилиштето
Два протеста се одржаа денеска против најавената изградба на станбените висококатници на просторот зад бензинската пумпа на „Макпетрол“. Едниот се одржа на платото пред СРЦ „Борис Трајковски“ во организација на „Независни за Карпош – За заштита на Карпош“ со поддршка на голем дел граѓански организации и здруженија, а другиот, во организација на Левица, се одржа во близина на градилиштето.
Двете групи протестанти побараа да се поништи издадената градежна дозвола и да не се дозволи изградба на овој комплекс кој, според нив, се гради во заштитена зона.
Од „Независни за Карпош“ се надеваат дека ќе се поништи дозволата за градба, а како причина го наведуваат веќе еднаш издаденото негативно мислење кое подоцна беше издадено како позитивно конзерваторско мислење од поранешниот директор Константин Димитров, кој сега е во домашен притвор поради соучество во уривањето на објектот „Шар ан“.
Иако, според сознанија на „Независни за Карпош“ имало првично негативно мислење од конзерваторскиот центар, Димитров формирал комисија која потоа дала зелено светло за градежна дозвола, а тој истовремено бил и член на комисијата за урбанизам во Карпош. Жалбата во министерството за култура е поднесена уште пред два месеца.
Од Општина Карпош реагираат дека протестот бил политички организиран и не ја изразувал волјата на мнозинството граѓани.
„Општина Карпош продолжува да се развива. Ова е наша последна инвестиција која успеавме да ја донесеме која носи со себе вработувања, развој и комуналии кои ќе значат проекти за граѓаните на Карпош. Општина Карпош во изминатиот период интензивно работеше на создавање на услови за нови инвестиции. Градоначалникот Јакимовски и општинската администрација овозможија да се оствари капитална инвестиција во станбена изградба во вредност од 50 милиони евра. Оваа инвестиција ќе ја зголеми понудата на станови во општината, ќе влијае на стабилизација на цената, и во исто време ќе обезбеди повеќе од 2 000 работни места“,
се наведува во соопштението на Општината.
Градоначалникот на Општина Карпош Стевчо Јакимовски неодамна изјави дека новите згради кај „Алумина“ предвидени во Деталниот урбанистички план, се современи објекти како што има во Дубаи, Чикаго, Торонто, Виена, Софија и во Белград.
Фото: Телма