Како што соопштија попладнево од Обвинителството, во акцијата се одземени многубројни материјални докази и приведени се девет осомничени лица, додека две лица се недостапни на органите на прогонот
Група од 11 лица се осомничени за продажба и уривање на хотел, кој претставувал автентичен објект во Старата скопска чаршија, прогласен за културно наследство од непроценлива вредност за државата, со цел потоа да ја продадат парцелата на која се наоѓал уништениот објект.
Ова попладнево го соопштија од Основното јавно обвинителство, од каде што се вели дека под раководство на јавен обвинител од Основното јавно обвинителство за гонење организиран криминал и корупција, единиците на МВР спровеле акција во која се извршени претреси на повеќе локации во Градот Скопје.
„Предметниот јавен обвинител, постапувајќи по кривичната пријава, донесе Наредба за спроведување на истражна постапка против 11 лица за кои постои основано сомневање дека сториле кривични дела злосторничко здружување предвидено и казниво по чл. 394 од КЗ и оштетување или уништување добра под привремена заштита или културно наследство или природни реткости од чл. 264 став 1 од КЗ, а петмина од нив сториле и кривично дело Злоупотреба на службената положба и овластување од чл.353 од КЗ“,
велат од Обвинителството.
Како што соопштија попладнево од Обвинителството, во акцијата се одземени многубројни материјални докази и приведени се девет осомничени лица, додека две лица се недостапни на органите на прогонот.
Во соопштението се вели дека според диспозитивот на наредбата за спроведување на истражна постапка четворицата првоосомничени во периодот од октомври 2022 до септември 2023 година создале група на која припадници станале останатите осомничени.
„Првоосомничениот како претседател на Одбор на директори на акционерско друштво, со намера за себе и за другите членови на групата да прибави противправна имотна корист, не ги извршил своите службени овластувања определени во Статутот на друштвото и предизвикал штета на Буџетот на РСМ од значителна вредност. Тој, иако знаел дека Хотел ‘Шар ан’, кој се наоѓа во склоп на Старата скопска чаршија, претставува културно наследство и е дел од заштитена споменичка целина и не може да биде предмет на продажба, не ги презел своите законски овластувања за заштита на објектот, туку побарал од дел од припадниците на групата да извршат негово противправно рушење и уништување“,
пишува во соопштението од ОЈО.
Оттаму велат дека во периодот од месец октомври и ноември 2022 година четворица припадници на групата како градежни работници без да поседуваат документација за дозволеност за преземање на дејствија за рушење, употребувајќи механизација извршиле противправно уништување на автентичниот објект Хотел „Шар ан“.
„Во исто време двајца од организаторите и еден припадник на групата во својство на службени лица чија службена должност е преземање на мерки за заштита на недвижните културни наследства, иако знаеле за насилното уништување на автентичниот објект Хотел ‘Шар ан’, дозволиле негово целосно уништување и не презеле ниту едно дејствие со кое ќе го запрат или спречат незаконското рушење на објектот од културно наследство“,
додаваат од ОЈО.
Според Обвинителството, второосомничениот како еден од организаторите на групата во текот на целиот период на рушење бил запознаен и се согласил со преземањето на противзаконските дејствија, од кои, како што пишува во соопштението, требало да оствари директна корист.
„Тој до Агенцијата за катастар на недвижности поднел пријава за запишување на промена од т. 19 – бришење на срушен објект, па кон пријавата приложил Изјава за правна заинтересираност за купопродажба на катастарска парцела и Геодетски елаборат. Геодетскиот елаборат бил изработен од правно лице сопственост на сопруга на еден од осомничените – поранешен заменик директор на Агенцијата за катастар на недвижности на кој му биле познати законските постапки за вршење на упис и промени во катастарската евиденција и кој презел низа дејствија давајќи конкретни насоки и обезбедувајќи услови за извршување на промената во катастарската евиденција“,
велат од ОЈО.
Во соопштението се објаснува и што направил припадникот на групата во својство на службено лице.
„Пречекорувајќи ги границите на своите службени овластувања презел службено дејствие и спровел постапка за упис на промена на културата на КП од градежно изградено во градежно неизградено земјиште, без постоење на правна основа за вршење на промена и без да обезбеди стручен наод од правната служба на АКН. Воедно, ги избришал податоците од графата за право на стопанисување со недвижноста во корист на АДССДП овозможувајќи му на второосомничениот да го искористи наводниот правен интерес за купопродажба на предметната парцела на која се наоѓал уништениот објект – културно наследство од непроценлива вредност за РСМ и со чие насилно уништување е предизвикана штета на државата во износ од значителна вредност од 180 000 000,00 денари,
велат од ОЈО.
Осомничените во текот на денот ќе бидат изведени пред судија на претходна постапка при Основниот кривичен суд – Скопје.
Обвинителството на крајот од соопштението дава објаснување за споменичката целина Стара скопска чаршија.
„Споменичката целина Стара скопска чаршија е настаната во периодот од XV до XX век врз урбана структура што потекнува од XI век. Како културно наследство од особено големо значење е добро од општ интерес за РС Македонија и ужива посебна заштита со Законот за прогласување на Старата скопска чаршија за културно наследство од особено значење, Законот за заштита на културното наследство и други закони. Прогласувањето на споменичката целина Старата скопска чаршија за културно наследство од особено значење подразбира трајно зачувување на историските, уметничките, архитектонските, урбанистичките, амбиенталните, етнолошките, социолошките и другите научни и културни вредности, како и автентичноста, единственоста, разновидноста, интегралноста, староста и други својства, содржини и функции и спречување на дејствија, појави и влијанија со кои се врши или може да настане оштетување или деградирање. За објектите во рамките на чаршијата кои припаѓаат на целината прогласена за културно наследство може да се овозможи само реставрација со обезбедени заштитно конзерваторски услови, но не и рушење и уништување“,
објаснуваат од ОЈО.
Инаку, „360 степени“ утрово објави дека во полициска акција што се одвива на подрачјето на Скопје се уапсени десетина лица поради економски криминал.