Демократската унија за интеграција, се додава во соопштението, останува доследна на својот став за почитување на гласот на албанскиот народ и другите етнички заедници бидејќи, како што велат, тоа е единствената гаранција за стабилност и прогресивен континуитет на земјата
Демократската унија за интеграција (ДУИ) денеска преку соопштение реагираше на вчерашната партиска изјава на ВМРО-ДПМНЕ во која рекоа дека лидерот на интегративците, Али Ахмети треба да престане да се однесува како палаво дете кое плаче по играчката која не е негова.
Од ДУИ велат дека за скандалозниот израз „Ахмети да престане да се однесува како палаво дете кое плаче за играчка која не е негова“, на ВМРО-ДПМНЕ треба да им биде јасно дека владата не е играчка во нивни и ничии раце и кршењето на волјата на сувереност е антидемократски чин и против Охридскиот договор.
Од ДУИ велат дека се скандализирани од навредливиот наратив на ВМРО-ДПМНЕ кој, како што додаваат оттаму, го потврдува флагрантното кршење на изразената изборна волја на албанскиот народ и другите етнички заедници, чие соединување во „Европскиот фронт“ се покажа како втора политичка сила во државата.
„Седумгодишниот антиалбански наратив наметнат од ВМРО-ДПМНЕ создаде искривена, неточна и опасна слика за нашата држава“,
се вели во соопштението од ДУИ.
Демократската унија за интеграција, се додава во соопштението, останува доследна на својот став за почитување на гласот на албанскиот народ и другите етнички заедници бидејќи, како што велат, тоа е единствената гаранција за стабилност и прогресивен континуитет на земјата.
„Оваа земја е заедничка и секој треба да придонесе за здрави меѓуетнички и меѓусоседски односи, како и партнерство со САД. Никој да не мисли дека народот ќе дозволи враќање назад од започнатиот пат на еднаквоста и европскиот пат“,
велат од ДУИ.
Од партијата уште еднаш повторуваат дека целосниот изборен и демократски легитимитет и кредибилитет му припаѓа на „Европскиот фронт“ и оти безусловното вазалство на губитниците е предодредено да пропадне бидејќи ја нема поддршката од народот.
Денешната реакција на ДУИ е откако вчера од ВМРО-ДПМНЕ одговорија на прес-конференцијата на Али Ахмети, која ја одржа во партиското седиште во Мала Речица, и од каде што рече дека ВМРО-ДПМНЕ во изминатите осум години целата своја кампања ја темелела против Албанците и ДУИ во форма на софистицирана војна, употребувајќи нацистички наратив.
По ова стигна одговор од ВМРО-ДПМНЕ во кој се рече дека нема ниту мајоризација, ниту шовинизам, ниту е важно што Ахмети имал чувство на навреденост, важно е, додадоа оттаму, што волјата на мнозинството е ДУИ да оди во опозиција и да се соочи со одговорност.