„Демократската унија за интеграција ја повикува опозицијата да го прифати и да го поддржи Договорот за добрососедство со Република Бугарија, кој е меѓународен договор и согласно Уставот неговото правно дејство не може да се менува”, истакна меѓу другото Арбер Адеми, координатор на пратеничката група на ДУИ на денешната прес-конференција
Говорејќи за неуставноста на иницијативата за референдум за поништување на Договорот со Бугарија, која ја поднесе ВМРО-ДПМНЕ, пратеничката група на Демократската унија за интеграција (ДУИ) денеска го повика проевропското крило на опозицијата да направи сè за, како што посочи, да не се загрози членството на Северна Македонија во НАТО и да запре нејзиниот европски пат.
„Демократската унија за интеграција ја повикува опозицијата да го прифати и поддржи Договорот за добрососедство со Република Бугарија, кој е меѓународен договор и согласно Уставот неговото правно дејство не може да се менува”,
истакна меѓу другото Арбер Адеми, координатор на пратеничката група на ДУИ на денешната прес-конференција.
Според ДУИ, опозицијата намерно ја има смислено и поднесено иницијативата на правно неиздржан начин за организирање референдум со цел таа да биде одбиена, а притоа да создаде тензии и поделби помеѓу граѓаните.
„Иницијативата на опозицијата е насочена кон попречување на патот кон Европската Унија. Жалам за антиевропското убедување и дејствување на опозицијата, но едно е јасно, дека враќање назад нема да има, дека земјата нема да се изолира од останатиот демократски свет“,
рече Адеми.
Пратеничката група на ДУИ посочи дека партијата нема да дозволи ретроградните сили да ја закочат иднината на Република Северна Македонија оти, како што посочи, граѓаните веќе јасно го дадоа својот глас ‘за’ Европска Унија и НАТО.
Ставот на ДУИ го дели и Социјалдемократскиот сојуз чиј пратеник Мартин Костовски денеска на прес-конференција кажа дека од ВМРО-ДПМНЕ се свесни за противуставноста на иницијативата за референдум која што ја поднесоа до Собранието.
Потпретседателот на опозициската ВМРО-ДПМНЕ, Владо Мисајловски, денеска информира дека органите на партијата ќе заседаваат и ќе разговараат за сите правни дилеми и за понатамошни чекори што ќе ги преземат во врска со референдумската иницијатива која што ја поднесоа до Собранието, откако таа вчера беше отфрлена од собранискиот претседател Талат Џафери поради нејзината неуставност.
Претседателот на Собранието Талат Џафери вчера ја отфрли иницијативата на ВМРО-ДПМНЕ за распишување на задолжителен референдум за укинување на Договорот со Бугарија.
Во одговорот до Мицкоски, Џафери пишува дека иницијативата со која се бара да се распише референдум за престанок на важењето на Законот за ратификација на Договорот за пријателство, добрососедство и соработка меѓу Република Македонија и Република Бугарија, не е во согласност со Уставот.