Францускиот предлог даден во форма на идеи за решение, е добра основа за завршување на спорот и за одблокирање на нашиот европски пат, оценува Демократската унија за интеграција. Во соопштение испратено по средбата на владините коалициски партнери, од ДУИ велат дека предлгот е шанса што не се пропушта.
„Нашата земја е пред историска одлука, онаа на отворање на преговорите со Европската унија и затворање на сите спорни прашања со соседите, затоа цениме дека ваквите шанси за компромис кои не го загрозуваат идентитетот, јазикот и националното достоинство на нашите македонски сограѓани не треба да се пропуштаат, заради сигурната и прогресивната иднина на државата и регионот“
соопшти ДУИ.
Демократската Унија за Интеграција апелира до сите страни вклучени во овој историски процес рационално да пристапат кон содржината на предлогот и заедно да се донесе долгоочекуваната одлука за одблокирање на интегративниот пат на земјата.
„Заедно со партнерите од владината коалиција, опозицијата, Собранието, Претседателството, државните институции, како и медиумите, граѓанското општество, академскиот свет, врз принципите на транспарентност го започнуваме процесот на консултации во кои како никогаш досега се бара зрелост и рационалност, а не субјективен протагонизам за тесни интереси“
велат од партијата.
Од партијата додаваат дека остануваат доследни на своите позиции за решавање на спорот со Бугарија и поради посочуваат дека францускиот предлог е во дозволените рамки на рационален компромис.
„Овој предлог, овој пат, оваа европска иднина ја има поддршката од Вашингтон, Брисел, Париз, Лондон, Рим, другите западни престолнини, а сите достигнувања ги имаме постигнато заедно со евро-американската заедница“
порачаа од ДУИ.