Семејството обвинува дека таа починала како резултат на лекарска грешка, додека од ГАК објаснуваат дека пациентката имала комплицирана здравствена состојба со многу болести
Министерот за здравство Венко Филипче најави дека ќе биде спроведен надзор од страна на Државниот здравствен и санитарен инспекторат, а доколку има потреба ќе се спроведе и стручен надзор
Семејството на 33-годишната пациентка, која почина утринава на КАРИЛ, обвинува дека смртта настанала поради лекарска грешка од оперативен зафат што бил извршен на Клиниката за гинекологија. Оттаму, пак, негираат дека има грешка и велат дека врз пациентката е извршен уреден оперативен тек. Министерот за здравство Венко Филипче најави дека ќе биде спроведен надзор од страна на Државниот здравствен и санитарен инспекторат, а доколку има потреба ќе се спроведе и стручен надзор.
Од семејството на почината велат дека по операцијата на Гинекологија, каде што ѝ бил отстранет миом на матка, нејзината ситуација се влошила по што ја префрлиле на Клиниката за абдоминална хирургија каде што е извршена уште една интервенција од страна на д-р Љубомир Огњеновиќ.
„Констатирано е дека при шиење на матката на четири места е продупчено и сошиено тенкото црево, што довело до контаминација на организмот со фекалии и труење! Последниот обид на д-р Огњановиќ да направи интервенција е на 6.5.2021, тенкото црево е скратено и санирани се загноените рани, ставен е дрен за да може организмот да ја исфрли непотребната течност“,
вели член на семејството на починатата за „Слободен печат“.
Операцијата на Клиниката за гинекологија ја водела директорката на оваа установа, д-р Викторија Јовановска, која појаснува дека не станува збор за родилка, туку за пациентка која била оперирана.
Од Клиниката за гинекологија велат дека пациентката е примена кај нив на 21.4.2021 година со голем тумор на матката и е извршена операција на 22.4., со уреден оперативен тек. Во првите шест дена пациентката била стабилна и нормално се хранела. Шестиот ден по операцијата, таа добила силни болки и состојбата ѝ се влошила поради што повторно била оперирана, а присуствувал и абдоменален хирург.
Тогаш, велат од ГАК, откриено е продупчено тенко црево, но, како што велат, најверојатно како резултат на претходните болести. Пациентката била префрлена на Клиниката за дигестивна хирургија, каде што 11 дена по операцијата настанала повторна компликација со цревата, најверојатно поради претходните болести и пациентката е повторно оперирана.
По ова пациентката, според ГАК, повторно била во стабилна состојба и хоспитализирана на Клиниката за дигестивна хирургија. Но, утрото на 09.5.2021 година, под сомнение за белодробна тромбоемболија, пациентката итно е префрлена на КАРИЛ, каде што починала по многу кратко време, се вели во соопштението.
Министерот за здравство Венко Филипче денеска најави дека ќе биде спроведен надзор преку Државниот здравствен и санитарен инспекторат.
„Ќе иницираме соодветен надзор преку Државниот санитарен и здравствен инспекторат, а доколку е потребно, и стручен надзор“,
рече Филипче денеска одговарајќи на новинарско прашање.