Од ДСЗИ информираат дека согласно надлежностите направен бил увид во медицинската евиденција и документација на одделението за гинекологија и акушерство, како и на неонаталошкото одделение во битолската болница
Државниот санитарен и здравствен инспекторат (ДСЗИ) ќе иницира формирање комисија која ќе треба да утврди дали имало пропусти во начинот на лекување на родилката и новороденчето од Ресен кое минатата недела почина 30 часа по породувањето.
Од ДСЗИ велат дека во четвртокот веќе извршиле вонреден инспекциски надзор во битолската болница и на Клиниката за детски болести во Скопје, како и во приватната здравствена установа „Д-р Тони“ во Битола.
Од увидот во неонатолошката документација е констатирано дека новороденчето при раѓање имало ливидна кожа, ослабен тонус, ослабени рефлекси и брадикардија.
Според соопштението од ДСЗИ, кога новороденчето било донесено во битолската болница веднаш му било направена аспирација, вештачка вентилација, тактилна стимулација и срцева масажа.
„Ординирана е терапија, направени се лабораториски анализи (крвна слика и ацидобазен статус) на 14.06.2024 и 15.06.2024. Поради влошување на клиничката слика на 5.06.2024 година, од страна на неонатлог од битолската болница, по претходна консултација со анестезиолог од КАРИЛ и ЈЗУ УК за детски болести – Скопје, извршен е транспорт со медицинско возило, но во тек на транспортот доаѓа до дополнително влошување на општата состојба со брадикардијата“,
се вели во соопштението од ДСЗИ.
При прием на Клиниката за детски болести, додаваат од ДСЗИ, новороденчето било без срцева акција и дишење.
„Спроведена е реанимациска постапка по протокол, без одговор на неа и е констатиран exitus letalis во 16:55 часот. Упатената дијагноза е P22.9 (респираторен дистрес синром) а причина за смртта insufitientio cardiorespiratoria“,
се наведува во соопштението.
Од ДСЗИ информираат дека согласно надлежностите направен бил увид во медицинската евиденција и документација на одделението за гинекологија и акушерство, како и на неонаталошкото одделение во битолската болница.
Во соопштението од ДСЗИ се наведува дека од увидот било констатирано дека родилката се јавила во здравствената установа на ден 14.6.2024 година поради болки кои перзистирале два дена. Откако бил извршен преглед од страна на специјалист гинеколог-акушер, направени биле две кардиотокографски иследувања и жената била примена на одделот за гинекологија и акушерство за породување со царски рез, со оглед на тоа што ова ѝ била втора бременост, а претходната ја имала во 2012 година, кога исто така била породена со цариски рез. Од родилката биле земени примероци за лабораториска анализа – крвнa слика и анализи за фактори на коагулација и крвна група во службата за трансфузиологија.
„Породувањето е извршено со спинална анестезија во 11:43 часот на наведениот датум за што постои писмена согласност од страна на родилката. По породувањето, и наредниот ден 15.06.2024 година, постојано се следи нејзината здравствена состојба и вршени се лабораториски анализи“,
се додава во соопштението од ДСЗИ.
Нејзината бременост претходно е следена од матичниот гинеколог во „Д-р Тони“ во Битола каде што според здравствениот картон се имала јавено во неколку наврати почнувајќи од декември.
Инспекцискиот надзор беше извршен по налог на заменичк-министерката за здравство Маја Манолева откако медиумите објавија дека новороденче починало откако поради влошената здравствена состојба е пренесено од битолската болница на Детската клиника во Скопје.
Мајката, според информациите што минатата недела ги пренесоа медиумите, неколку часа по породувањето била известена дека има проблеми со бебето, а следниот ден попладне тоа било пренесено во Скопје.
Родителите, кои се од Ресен, бараат одговори што се случувало со новороденчето од петокот вечерта до саботата попладне и обвинуваат дека болницата не интервенирала навреме.