Дел од трговците, како што вели директорот на ДПИ, ги задржале истите маржи на производите од пред носењето на владината одлука за нивно ограничување до 10 отсто бидејќи се во рамки на ограничувањето. Додава дека трговците може дури и да ги зголемат маржите на производите, сè додека се во рамки на ограничувањето од 10 отсто, што може да доведе до зголемување, а не до намалување на нивните цени
Трговците на мало не се должни дополнително да ги намалуваат бруто-профитните маржи на производите што се опфатени во владината одлука за ограничување на маржите ако веќе имаат маржа до 10 проценти, изјави на денешната прес-конференција Директорот на државниот пазарен инспекторат (ДПИ), Горан Трајковски.
Дел од трговците, како што вели Трајковски, ги задржале истите маржи на производите од пред носењето на владината одлука за нивно ограничување до 10 отсто, бидејќи се во рамки на ограничувањето, и затоа кај тие производи нема намалување на цените. Првиот човек на ДПИ додава дека трговците може дури и да ги зголемат маржите на производите, сè додека тие се во рамки на ограничувањето од 10 отсто, што може да доведе до зголемување, а не до намалување на нивните цени.
„Ако, на пример, трговецот на мало одел со заработка од пет отсто кај јогуртот, тој нема обврска да го намали. Некаде можеби оделе со маржа од три отсто. Сега имаме случаи каде што, за да си ги дополнат приходите онаму каде што ги намалиле маржите од 30 на 10 проценти, ги зголемуваат маржите на производот од три на 10 отсто. Јас како директор на ДПИ можам да апелирам, како општествено одговорни, ако имаат простор, да ги намалат и тие цени, но немаат обврска“,
изјави директорот на Државниот пазарен инспекторат на денешната прес-конференција.
На прашањето дали во владината одлука се опфатени и бурекчилниците, со оглед на тоа што со ограничени маржи треба да бидат и печените пекарски производи како бурек, симит, ѓеврек и банички, Трајковски одговара потврдно. Бурекчилниците, како што рече, се опфатени според членот 3 од Законот за трговија.
„Денеска ги контролираме големите маркети, од утре почнуваме со малите маркети и бурекчилниците, а од задутре со трговија на големо. Толеранција за никого нема да има и сите да си ја почитуваат одлуката. Сè додека јас сум директор на ДПИ, нема да има толеранција за никого. Ќе постапуваме по законските прописи и нема да толерираме никакви примени на нечесни трговски практики и секој оној што ќе се огреши ќе биде казнет“,
вели Трајковски.
Казните, според Законот за трговија, се од 2 000 до 10 000 евра, а доколку се утврди дека некој применува нефер трговски практики, како што посочи Трајковски, ќе се постапува по Законот за потрошувачи кој предвидува и можност за затворање на трговските објекти. Додава дека од вчерашните теренски проверки во маркетите, во кои учествувал и самиот, утврдил оти голем дел од трговците на мало не ја сфатиле сериозно владината одлука.