Засилените контроли на Пазарниот инспекторат следуваат по одлуката на Владата за замрзнување на цените на 24 категории производи кои во маркетите треба да се продаваат со ознаката „гарантирана цена“ и нема да смеат да поскапат до 30 ноември годинава. Станува збор за производи од пекарската, месната, млечната и кондиторската индустрија
Државниот пазарен инспекторат (ДПИ) синоќа казнил и пломбирал уште пет маркети ширум земјава кои не ја испочитувале одлуката за ограничување на цените на дел од прехранбените производи за кои Владата одлучи дека ќе се продаваат по „гарантирана цена“ до 30 ноември.
За ова на својот профил на Фејсбук синоќа информира првиот човек на Пазарен, Горан Трајковски.
„Казнети се и затворени пет маркети во Кавадарци, Гостивар, Куманово и Тетово“,
пишува Трајковски на Фејсбук.
Во објавата на Фејсбук, директорот на ДПИ потенцира дека инспекторите нема да прават компромис ниту селекција кога, како што вели, е во прашање интересот на граѓаните.
„Во повеќе наврати напоменав дека секој мора да ги почитува законите и одлуките на Владата. Исто така, нема да дозволам никој да ги манипулира и доведува во заблуда граѓаните – потрошувачите!“
додава Трајковски.
Пред неколку дена, министерот за економија Крешник Бектеши ги обелодени имињата на маркетите кои во скопскиот регион беа затворени од страна на ДПИ поради непочитување на владината одлука, велејќи дека граѓаните треба да знаат каде се почитуваат мерките за ограничување на цените.
Засилените контроли на ДПИ следуваат по одлуката на Владата за замрзнување на цените на 24 категории производи кои во маркетите треба да се продаваат со ознаката „гарантирана цена“ и нема да смеат да поскапат до 30 ноември годинава. Станува збор за производи од пекарската, месната, млечната и кондиторската индустрија.
Од вчера, пак, во сила стапи и одлуката за ограничување на цените на соковите, водата и пивото.