Министерството за правда информира дека ќе врши надзор над системот за електронска распределба на предметите во јавните обвинителства, а предлог-законот за дополнување на законот за јавното обвинителство ќе биде објавен на ЕНЕР.
„Донесувањето на закон за дополнување на законот за јавно обвинителство произлегува од потребата за зајакнувањето на механизмите за електронска распределба на предметите во јавните обвинителства и со него се прецизира надлежноста на органите и телата утврдени со законот за вршење на надзорот“,
велат од Правда.
Оттаму додаваат дека измената која се предлага е согласно основната намера на Владата на Република Северна Македонија за членство во Европската Унија и е во духот на реформите во областа на правосудството и негово натамошно унапредување.
„Како што е познато, Министерството за правда според законот за судовите врши редовен надзор врз функционалноста на АКМИС-системот во судовите. Министерството за правда по спроведените надзори во судовите изготвува записници и истите јавно ги објавува на веб-страницата на Министерството за правда и ги проследува до непосредно повисокиот суд и Судскиот совет на Република Северна Македонија. Исто така, Комисијата изготвува полугодишни извештаи кои се објавуваат на веб-страницата на Министерството за правда, во кои се содржани констатираните состојби во судовите во врска со примена на одредбите од Судскиот деловник и автоматската распределба и прераспределба на предметите во судовите што се врши преку АКМИС“,
додаваат од Министерството за правда.