Начелниот став на Општата седница бил предложен од претседателката на Врховниот суд на Република Северна Македонија, Беса Адеми
Судовите, донесените пресуди и решенија, кои не се правосилни и кои се однесуваат на предмети од јавен интерес да ги објавуваат на веб страницата на судот. Ова е начелниот став на Врховниот суд на Република Северна Македонија, утврден на денешната општа седница.
Начелниот став на Општата седница, како што информираат од таму, бил предложен од претседателката на Врховниот суд на Република Северна Македонија, Беса Адеми.
„Достапноста до судските одлуки е особено значајно за судската, стручната, медиумската и граѓанската јавност. Со ова, преку конкретно решавање на правното прашање, се исполнуваат целите на транспарентноста, систематизирани во Уставот како највисок правен акт, во нормативната рамка на процесните и системските закони, Европската конвенција за заштита на човековите права и практиката на Европскиот суд за човекови права“,
е образложението на претседателката на Врховниот суд Адеми, наведено во соопштението.
Врховниот суд го донесе Начелниот став врз основа на член 37, став 1, алинеја 1 и 3 од Законот за судовите, според кои Општата седница утврдува начелни ставови и разгледува прашања во врска со работата на судовите.
Од Врховниот суд информираат и дека на Општата седница е донесен Заклучок за поднесување Иницијатива до Министерството за правда за измени на одредбите од Законот за управување со движењето на предметите во судовите.