Во Дојран нема да се склучи договор за јавно-приватно партенрство во стопансувањето со услугите за водовод и канализација, одлучи мнозинството од жителите на општината на денешниот референдум.
На вториот референдум во последните три години во оваа општина жителите се изјаснуваа за референдумското прашање: „Дали сте за или против доделување на договор за јавно приватно партнерство за услугите снабдување со вода за пиење, одведување на урбани отпадни води и третман на урбани отпадни води во општина Дојран?“.
На гласање излегле 1.420 граѓани или 53,34 проценти од запишаните 2.662 во гласачкиот список. Од нив „за“ гласале 404, „против“ биле 978, а 38 ливчиња биле неважечки.
Според резултатите што ги соопшти Злата Ајцева од Општинската изборна комисија Дојран, јавно-приватно партнерство во Општина Дојран ќе нема.
Целиот изборен процес минал достоинствено и мирно, без проблеми, забелешки и инциденти.
Претходниот референдум во Дојран се одржа на 23 јули 2017 година, а се однесуваше на тоа дали дојранчани се согласуваат да се отворат рудници за металични минерални суровини. Референдумот и тогаш беше успешен, а одлуката на граѓаните беше дека не сакаат да се отворат рудници. „За“ гласаа само 51 лице, а „против“ 1.336.