Освен договорите од инфраструктурниот сектор, потпишан е и Меморандум за разбирање и соработка во областа на земјоделството, аграрни науки, селските реони и шумското стопанство, како и Меморандум за разбирање помеѓу ИАНМСП и Агенцијата за поттикнување на претприемништвото на Република Северна Македонија, од економскиот сектор
Неколку билатерални договори за соработка од различни области потпишаа ресорните министри во склоп на заедничката меѓувладина седница на Северна Македонија и Бугарија која денеска се одржува во Софија.
Министрите за транспорт и врски на Северна Македонија и Бугарија, Благој Бочварски и Николај Сабев, потпишаа Меморандум за развој на железничкото поврзување на Скопје-Софија, преку формирање на заедничка работна група, со цел забрзана изградба на железничкиот Коридор 8. Исто така, потпишаа и Иницијатива за воспоставување директна авиолинија Софија-Скопје и Меморандум за либерализација на стоки за и од трети земји.
Премиерот Димирар Ковачевски на отворањето на денешната меѓувладина седница најави оти во периодот што следува, Коридорот 8 ќе биде една од главните теми на кои ќе работи конкретната работна група во чиј делокруг е инфраструктурата, а како што најави „ќе се работи на сите делови на овој коридор и на патниот и на железничкиот, но и во делот на телекомуникациите“.
Директната авиолинија Скопје-Софија, пак, ја најави бугарскиот премиер Петков уште за време на посетата во Скопје, нагласувајќи дека во период од еден месец ќе се направат сите потребни анализи и проценки.
Премиерот Ковачевски на заедничката прес-конференција со премиерот Петков истакна оти за критериум за успешност на договорот за авиолинија Скопје-Софија ќе се смета доколку веќе идната недела се случи разговор помеѓу туристички оператори од Скопје и Софија на тема економски најодржливата авионска линија што би се воспоставила.
„Ако сме кажале дека ќе има авионска линија помеѓу Скопје и Софија, критериум за успешност е ако веќе идната недела имаме туристички оператори кои од Софија ќе дојдат во Скопје, или обратно, каде што ќе разговараат за најекономски одржливата авионска линија која што би се воспоставила и која што би почнала со комерцијални летови од први март“,
рече Ковачевски одговарајќи на новинарско прашање по однос на критериумите за успех на договорите кои се склучија помеѓу Софија и Скопје.
Министерот за транспорт и врски на Северна Македонија, Благој Бочварски претходно изјави дека ќе се бара компанија која ќе спроведува исплатливи рути, како на пример Скопје-Софија-Атина, со цел да се избегне нејзино субвенционирање.
Освен инфраструктурниот сектор, земјоделскиот и економскиот сектор се меѓу секторите на кои интензивно ќе се работи во претстојниот период.
Министрите за земјоделство на Северна Македонија и Бугарија, Љупчо Николовски и Иван Иванов денеска во Софија потпишаа Меморандум за разбирање и соработка во областа на земјоделството, аграрните науки, селските реони и шумското стопанство.
Министрите за економија на двете земји Крешник Бектеши и Даниел Лорер, пак потпишаа Меморандум за разбирање помеѓу ИАНМСП и Агенцијата за поттикнување на претприемништвото на Република Северна Македонија.