Од ТАВ Македонија, операторот со македонските аеродроми велат дека првите знаци на закрепнување на авиосообраќајот по значителниот пад поради ковид-пандемијата се забележани по омасовувањето на вакцинацијата против ковид-19, во втората половина од јуни и јули, сè до средината на август
Во првите девет месеци од годинава на македонските аеродроми се превезени за 57 проценти повеќе патници во однос на истиот период од 2020, односно за 52 проценти помалку споредено со првите три квартали од 2019 година. Од ТАВ Македонија, операторот со македонските аеродроми велат дека првите знаци на закрепнување на авиосообраќајот по значителниот пад поради ковид-пандемијата се забележани по омасовувањето на вакцинацијата против ковид-19, во втората половина од јуни и јули, сè до средината на август, а стабилизација и среднорочно и долгорочно закрепнување ќе има кога условите за влез во различни земји кои се поврзани со ковид-19 ќе се изедначат за сите државјани на сите држави.
Летови до Болоња, Торино и Билунд, на пазарот влегува и „Изиџет“
Од најавите на авиокомпаниите досега, до крајот на 2021 година, ќе има четири нови дестинации од Меѓународниот аеродром Скопје. Три нови дестинации ќе воведе „Виз ер“ во декември, од Скопје до Болоња, Торино и Билунд. Една нова дестинација, од Женева до Скопје, ќе биде отворена од „Изиџет“, британската нискобуџетна авиокомпанија, која со отворањето на оваа рута на почетокот на ноември 2021 година практично првпат ќе влезе на македонскиот пазар. Заедно со со овие, „Виз ер“ ќе отвори и нова авиолинија од охридскиот аеродром до германскиот град Фридрихсхафен.
Исто така, најголем дел од откажаните авиолинии со почетокот на пандемијата во 2020 година се вратени на распоредот на летање по повторното отворање на двата аеродроми во јули 2020 година, и потоа во 2021 година. Сепак, некои од дестинациите, како Доха со „Катар ервејс“ и Дубаи со „Флај Дубаи“, што постоеја пред пандемијата, сè уште не се вратени.
Единствената пречка за патувањата со авион се различните рестрикции наметнати од различни земји поради Ковид-19, коишто се менуваат често и го усложнуваат целиот процес на авионско патување, за патниците, но исто така и за играчите во авијацијата – аеродромите и авиокомпаниите.
Генералниот директор на ТАВ Македонија Метин Батак за МИА вели дека патниците ги следат правилата за заштита од ковид-19 воведени од ТАВ Македонија, на двата македонски аеродроми, Меѓународниот аеродром Скопје и Аеродромот „Свети Апостол Павле“ Охрид.
Од 19-ти август оваа година, потсетува, со цел да бидеме во согласност со Одлуката на Влада од 17-ти август 2021, ТАВ Македонија воведе нови правила за влез во терминалните згради на двата аеродрома, согласно кои патниците можат да влегуваат само со вакцинален сертификат или сертификат кој покажува дека прележале Ковид-19, или пак медицински доказ дека се негативни на Ковид-19 (ПЦР-тест или брз антигенски тест).
На двата аеродрома во периодот јануари-септември годинава се реализирани 11 203 лета, што претставува 61 процент зголемување споредено со истиот период од 2020 година, но е за 34 проценти помалку споредено со истиот период во 2019 година.