Нема оправдување за пожарите на депониите, бидејќи граѓаните не смеат да дишат загаден воздух, се наведува во соопштението на ДИЖС
Државен инспектор за животна средина вчера извршил надзор на запалена депонија во Велес, од која бил загаден и воздухот во градот. По надзорот, изречена е казна од 3.000 евра во денарска противвредност.
Исто така, издадена е и наредба за примена на законски пропишани технички услови – дневно прекривање со земја и 24 часовен надзор, согласно Законот за управување со отпад.
Од Државниот инспекторат за животна средина соопштија дека ќе продолжат со надзори на општинските непрописни депонии и тоа во Пробиштип, Охрид, Струмица, Берово, Ново Село, Русино и секаде каде комуналните претпријатија не постапуваат согласно закон.
„Известување до сите потенцијални загадувачи дека Инспекторатот повеќе не дава опомени, туку преминува директно на санкции. Нема оправдување за пожарите на депониите, бидејќи граѓаните не смеат да дишат загаден воздух“,
се наведува во соопштението на ДИЖС.